Mickoski refuzon ndryshimet kushtetuese siç kërkon Bullgaria — bisedimet vazhdojnë
Kryeministri thotë se bisedimet me Sofjen do të vazhdojnë pa afat, por e quan "bullying" mosrespektimin e vendimeve të Strasburgut për komunitetin maqedonas në Bullgari.
SHKUP — Kryeministri Hristijan Mickoski tha se nuk do të lejojë ndryshime kushtetuese në formën që aktualisht kërkon pala bullgare, por se bisedimet me Sofjen do të vazhdojnë. Në podkastin "Rishtazi", ai theksoi se është gati të bisedojë me këdo dhe kudo, pa kufizim kohor, derisa të gjendet një zgjidhje e qëndrueshme drejt anëtarësimit në BE.
Mickoski tha se gjatë këtij procesi çështjet duhet të trajtohen mbi baza parimore dhe se parimet duhet të vlejnë për të gjithë. Ai shmangu të thoshte cila qeveri e arriti marrëveshjen me Brukselin për propozimin francez, duke thënë se opinioni publik e di dhe e ka dëgjuar tashmë atë histori.
Kryeministri tha se ashtu si qeveria e mëparshme maqedonase mori përsipër angazhime, edhe një qeveri e mëparshme bullgare u zotua të respektojë të drejtat e njeriut. Sipas tij, ekzistojnë vendime të Gjykatës Evropiane për të Drejtat e Njeriut në Strasburg për komunitetin maqedonas në Bullgari, që kërkojnë respektim të të drejtave dhe lejim të regjistrimit të klubeve e organizatave.
Mosrespektimin e këtyre vendimeve, Mickoski e quajti "bullying", duke thënë se nuk ka lidhje me kriteret e Kopenhagës apo vlerat themeluese të BE-së të Schumanit, De Gasperit dhe Adenauerit. Ai tha se ajo që vlen për Shkupin duhet të vlejë edhe për Sofjen, dhe anasjelltas, jo vetëm aty ku i konvenon njërës palë.
Mickoski theksoi se qëllimi i qeverisë së tij është anëtarësimi i plotë në BE, jo një zgjidhje e përkohshme si lëshimet e mëparshme — ndryshimi i emrit, i flamurit, i kartëmonedhave dhe disa ndryshime të Kushtetutës — që secilën herë premtoheshin si hapi i fundit drejt anëtarësimit, por pa e sjellë atë.
Maqedonia e Veriut mbetet e ngujuar në rrugëtimin drejt BE-së për shkak të kontestit me Bullgarinë, ndërsa ndryshimi kushtetues, që kërkon shumicë prej dy të tretash, mbetet kusht për fillimin e negociatave. Më 19 korrik 2022, RMV nisi bisedimet aderuese pas miratimit të propozimit francez, të votuar në Kuvend pa pjesëmarrjen e opozitës së atëhershme, sot në pushtet.
Burim: Portalb
— Redaksia ZHURMA