Mickoski shfaqet 344 herë në YouTube-in qeveritar — çdo ditë të dytë

SHKUP — Kryeministri i Maqedonisë së Veriut, Hristijan Mickoski, ka qenë personazhi kryesor në 344 transmetime të drejtpërdrejta në kanalin qeveritar në YouTube gjatë dy viteve të fundit në pushtet. Për krahasim, YouTuberi më i famshëm në vend ka pasur tri herë më pak transmetime të drejtpërdrejta vetëm në gjashtë muajt e parë të vitit 2026.

E llogaritur me ditë, kjo do të thotë që Mickoski ka dalë para kamerave shtetërore pothuajse çdo ditë të dytë gjatë dy viteve në pushtet. Vetëm në gjashtë muajt e parë të vitit 2026, kryeministri ka qenë personazhi kryesor në 117 transmetime.

Pas këtij prodhimi mediatik qëndron një ekip i tërë shtetëror. Departamenti i marrëdhënieve me publikun pranë Sekretariatit të Përgjithshëm të Qeverisë ka aktualisht 14 punonjës, ndërsa Sektori i protokollit, përkthimit e marrëdhënieve me publikun punësoi gjithsej 22 persona vetëm në vitin 2025.

Qeveria përdor gjithashtu një softuer të posaçëm për vlerësimin e ndikimit mediatik dhe konvertimin e të folurit në tekst, i blerë vitin e kaluar me mbi 400.000 euro. Çdo mëngjes, softueri i dërgon 30 institucioneve shtetërore një raport për gjithçka që publikohet në media dhe në rrjetet sociale.

Numri i ndjekësve të Mickoskit ndryshon sipas platformës: 8.000 në TikTok, 12.000 në X, 35.000 në Instagram dhe rreth 170.000 në Facebook. Por, sipas vëllimit të përmbajtjes së prodhuar dhe numrit të shikimeve, atij i atribuohet titulli "influenceri numër një" në vend.

Komunikologu Sead Xhigall, profesor në Universitetin Ndërkombëtar Ballkanik në Shkup, thekson se nëse komunikimi politik fillon të dominojë mbi proceset e krijimit dhe zbatimit të politikave, ekziston rreziku që Qeveria të funksionojë më shumë si një produksion mediatik sesa si pushtet ekzekutiv.

Ivo Bosillkov, nga Instituti i Shkencave Politike në Universitetin e Silesisë në Katovice, e quan të pritshme këtë sjellje të kryeministrit. Qeveria nuk iu përgjigj pyetjeve të dërguara, përfshirë atë nëse angazhon kompani apo individë të jashtëm për marrëdhëniet me publikun.

Burim: Portalb
— Redaksia ZHURMA