Meloni: Kush thyen do të paguajë, po zbulojmë identitetin e personave me kapuç

Kryeministrja e Italisë, Giorgia Meloni, ka zhvilluar një mbledhje të kabinetit për të miratuar masa të reja sigurie pas protestave dhe trazirave të shënuara në disa qytete nga përplasjet me policinë, plaçkitjet dhe vandalizmat. Paketa e re prezanton një vepër penale për pjesëmarrjen e dhunshme në demonstrata, dënime më të ashpra dhe përgjegjësi të menjëhershme financiare për prindërit e fëmijëve që marrin pjesë në akte të tilla. Gjatë fundjavës, protestues me kapuçë i kishin vënë flakën kazanëve dhe kishin plaçkitur dyqane në Milano e qytete të tjera, pas protestave për shërbimet publike dhe rritjen e kostove.

Qeveria italiane ka njoftuar vendosjen e 500 trupave shtesë të ushtrisë në Milano deri në fund të vitit, të cilat do të bashkëpunojnë me policinë dhe karabinierët për të forcuar sigurinë. Sipas qeverisë, ndalimi parandalues do të zgjerohet edhe te të miturit, ndërsa sistemi i drejtësisë për të miturit do të forcohet me më shumë magjistratë dhe vende në qendrat e paraburgimit që dënimet të zbatohen edhe ndaj 16-vjeçarëve. «Dyqane të plaçkitura, dritare të thyera, forca të rendit të sulmuara: këto janë skena të papranueshme, të cilat askush nuk duhet të mendojë t’i minimizojë apo t’i justifikojë», deklaroi Meloni, duke shtuar se po përdoren identifikimi biometrik dhe inteligjenca artificiale për të zbuluar personat që fshihen pas kapuçëve.