Shqipëria dërgon kontingjentin e parë të helikopterëve në KFOR
Forcat e Armatosura të Shqipërisë nisën kontingjentin e parë të helikopterëve dhe efektivëve drejt misionit të NATO-s në Kosovë.
Redaksia ZHURMA · · 1 min lexim
Ministri i Mbrojtjes i Shqipërisë, Ermal Nufi, njoftoi se kontingjenti i parë i helikopterëve shqiptarë u nis për t’iu bashkuar misionit të NATO-s, KFOR, në Kosovë. Sipas tij, në këtë mision marrin pjesë 13 efektivë të Forcave të Armatosura të Shqipërisë, çka dëshmon profesionalizmin e ushtarakëve dhe angazhimin e vendit si aleat i NATO-s.
Në njoftimin e tij, Nufi theksoi se ky mision ka rëndësi të veçantë për shkak të raporteve vëllazërore dhe historike me Kosovën, por edhe për sigurinë e përbashkët. «Për Shqipërinë, ky mision ka një rëndësi të veçantë, jo vetëm për lidhjen vëllazërore dhe historike me Kosovën, por edhe sepse siguria dhe stabiliteti i Kosovës lidhen drejtpërdrejt me paqen dhe sigurinë e Shqipërisë dhe gjithë rajonit tonë», u shpreh ai.
Nga ana tjetër, nisja e këtij kontingjenti për herë të parë nga Forca Ajrore e Shqipërisë u konfirmua gjithashtu nga shefi i Shtabit të Përgjithshëm të Forcave të Armatosura, gjenerallejtënant Arben Kingji, i cili e cilësoi këtë angazhim si një përgjegjësi të rëndësishme.
