Policia në Gjermani identifikoi 12 të mitur për sulmin ndaj 14-vjeçarit

Policia gjermane ka identifikuar 12 fëmijë dhe adoleshentë të moshës nga 9 deri në 15 vjeç, të cilët dyshohen se kanë rrahur dhe keqtrajtuar për disa orë një 14-vjeçar në qytetin Neubrandenburg të landit Mecklenburg-Vorpommern në Gjermani. Sipas autoriteteve gjermane, në mesin e të dyshuarve ka shtetas gjermanë, shqiptarë, tunizianë si dhe persona me prejardhje gjermano-turke.

Sipas raportimeve nga mediumi gjerman BILD dhe autoritetet zyrtare, ngjarja e dhunës ndaj të miturit u filmua nga disa kënde dhe pamjet qarkulluan në rrjetet sociale. Hetimet e policisë zbuluan se disa nga personat e identifikuar morën pjesë drejtpërdrejt në sulm, ndërsa të tjerë e incizuan ngjarjen me telefonat e tyre mobilë.

Sipas të dhënave të publikuara nga policia, gjatë sulmit ndaj 14-vjeçarit janë përdorur grushte, shqelma dhe sende të ndryshme, si dhe i janë shkaktuar djegie. Zyrtaresht u njoftua se fillimisht policia raportoi për lëndime të lehta, mirëpo pas vlerësimit mjekësor viktima u klasifikua si i lënduar rëndë dhe u dërgua për trajtim në spital. Hetuesit kanë sekuestruar telefonat e të dyshuarve ku u gjendën materiale filmike që ndihmuan në përcaktimin e rolit të secilit participant.

Policia kriminale në Neubrandenburg po e heton ngjarjen për vepra të dyshuara penale që përfshijnë lëndimin e rrezikshëm trupor, detyrimin dhe fyerjen. Autoritetet gjermane bënë të ditur se nuk kanë dhënë detaje të tjera për personat me rolin kryesor për arsye hetimore. Për të dyshuarit nën moshën 14-vjeçare, masat do të trajtohen në bashkëpunim me shërbimet për mbrojtjen e të miturve, pasi sipas ligjit në Gjermani ata nuk kanë përgjegjësi penale.