Turistët italianë zbulojnë Vlorën — nata në hotel kushtoi 34 euro

TIRANË — Media italiane “Turisti per Caso” ka publikuar ditarin e një udhëtimi shtatëditor në Shqipëri, duke e vlerësuar vendin si një destinacion magjepsës dhe ekonomik për t'u vizituar në pranverë. Autorët tregojnë përvojën e tyre në zbulimin e bukurive të gjirit të Vlorës dhe të Rivierës.

Udhëtimi nisi nga aeroporti i Gjenovës me kompaninë “Wizz Air”, ku dy biletat vajtje-ardhje kushtuan gjithsej vetëm 80 euro. Pasi mbërritën në Tiranë, ata morën me qira një makinë “Fiat Panda” dhe udhëtuan drejt Orikumit, ku u akomoduan në një hotel me pamje nga deti për 34 euro nata.

Gjatë ditëve të para, italianët eksploruan manastirin e Zvërnecit në lagunën e Nartës dhe qytetin e Vlorës, ku vizituan Xhaminë e Plumbit dhe Kalanë e Kaninës. Ata shijuan peshkun e freskët në Orikum për 20 euro për person dhe vlerësuan qetësinë e këtij destinacioni larg zhurmës së qyteteve.

Rrugëtimi i tyre vazhdoi drejt jugut në Dhërmi, një nga perlat e Rivierës shqiptare, i rrethuar nga Malet e Vetëtimës. Çifti shijoi plazhin e Orikumit dhe u ngjit në Tragjas për të provuar mish qengji dhe dhallë, duke vlerësuar autenticitetin e jetës rurale në fshatrat e bregdetit.

Turistët ndoqën më pas rrugën bregdetare SH8 drejt Porto Palermos, ku vizituan kalanë historike në gadishullin e vogël. Kjo zonë ofron plazhe të mrekullueshme, të cilat ngjasojnë me peizazhet e virgjëra dhe me disa nga plazhet më të bukura pranë Sarandës.

Në ditën e fundit të qëndrimit të tyre, rrugës për në aeroport, çifti italian vizitoi manastirin ortodoks të Ardenicës. Ky monument ka rëndësi të veçantë historike, pasi aty u celebrua martesa e heroit kombëtar Gjergj Kastrioti Skënderbeu në vitin 1451, përpara se ata të shijonin ëmbëlsirën tradicionale trileçe.

Udhëtimi përfundoi më 30 maj me fluturimin e kthimit për në Itali. Përvoja e tyre vërteton se Shqipëria mbetet një vend me mikpritje të lartë, histori të pasur dhe kosto mjaft të përballueshme për vizitorët e huaj që duan të eksplorojnë bregdetin Adriatik dhe Jon.

Burim: ATSH
— Redaksia ZHURMA