Mbledhje në Kryeministri për projektbuxhetin dhe zhvillimet politike

Kryeministri Edi Rama ka thirrur në Kryeministri ministrat e kabinetit qeveritar dhe drejtuesit politikë të Partisë Socialiste në qarqe për një takim të parashikuar të nisë në orën 09:30. Mbledhja zhvillohet në një moment me zhvillime të rëndësishme politike dhe tensione, ndërsa prej mbi dy javësh në Tiranë po zhvillohen protesta nga studentë dhe pedagogë që kërkojnë dorëheqjen e qeverisë.

Në fokus të diskutimeve në këtë takim janë projektbuxheti për vitin 2027 dhe paketa e re fiskale. Gjysmë ore pas nisjes së këtij takimi, në orën 10:00, projektligji për Buxhetin 2027 dhe ndryshimet e propozuara në legjislacionin fiskal do të prezantohen në Komisionin për Ekonominë, Punësimin dhe Financat.

Paketa fiskale përfshin ndryshime në disa ligje kyçe, përfshirë akcizat, Tatimin mbi Vlerën e Shtuar, taksat kombëtare, tatimin mbi të ardhurat dhe procedurat tatimore. Pas shqyrtimit dhe diskutimit, projektbuxheti dhe paketa pritet të kalojnë për miratim në Kuvend.