Nis restaurimi i Çarshisë së Vjetër — investohen 28 milionë denarë
Kryetari i Çairit, Izet Mexhiti, njoftoi se faza e parë përfshin ndërtimin e rrjetit të ri të ujësjellësit dhe kanalizimit.
SHKUP — Për restaurimin dhe modernizimin e Çarshisë së Vjetër të Shkupit do të investohen mbi 28 milionë denarë. Kryetari i Komunës së Çairit, Izet Mexhiti, njoftoi se punimet kanë hyrë në fazën e parë të zbatimit, pas një inspektimi të drejtpërdrejtë që u bë për të parë nga afër ecurinë e aktiviteteve ndërtimore.
Nga Komuna e Çairit bëjnë të ditur se kjo fazë fillestare përfshin ndërtimin e rrjetit të ri të ujësjellësit dhe kanalizimit. Ndërkaq, fazat e ardhshme parashikojnë restaurimin e kalldrëmit të vjetër, vendosjen e ndriçimit të ri me stil tradicional dhe rregullimin e hapësirave publike në këtë zonë historike.
Sipas Mexhitit, ky investim do t’i rikthejë Çarshisë së Vjetër funksionalitetin dhe dinjitetin e merituar, pa e dëmtuar autenticitetin e saj. Projekti synon të përmirësojë hapësirën publike të njërës prej qendrave më të rëndësishme ekonomike dhe kulturore të Shkupit.
Burim: Shenja
— Redaksia ZHURMA