Mbi 2 mijë raste të dhunës në familje të regjistruara brenda nëntë muajve

Gjatë periudhës nga janari deri në shtator në Kosovë janë regjistruar 2.052 raste të dhunës në familje, me gjithsej 2.138 viktima, ku 76 për qind e tyre janë gra, sipas të dhënave të publikuara nga Policia e Kosovës. Kjo shifër vjen pas raportimeve të mëparshme për dhunën në familje, ndërsa së fundmi autoritetet kanë regjistruar shtatë raste të reja gjatë 24 orëve të fundit.

Sipas të dhënave të Policisë së Kosovës, nga numri i përgjithshëm i viktimave gjatë nëntë muajve, 1.626 janë femra kurse 512 janë meshkuj, ndërsa rajoni me më së shumti viktima është Prishtina me 695 raste, ku 550 prej tyre janë femra. Pas Prishtinës, për dhunë në familje pason Peja dhe më pas renditen Gjakova e Gjilani. Sipas raportimeve ditore, për më pak se dy javë, në periudhën nga 21 tetori deri më 2 nëntor, janë regjistruar mbi 60 raste të dhunës në familje. Në nivel vendi, 176 raste janë të përsëritura.

Sociologu Genc Zërxa ka deklaruar se gratë janë më të atakuara nga kjo dhunë, ndërsa ka përmendur edhe mungesën e autoritetit të prindërve dhe raste kur fëmijët kanë ushtruar dhunë ndaj anëtarëve të familjes. Zërxa ka shtuar se abuzimi i substancave narkotike, drogat e ndryshme dhe rrjetet sociale rëndojnë shëndetin mendor dhe shfaqin dhunë të ndryshme. Nga ana tjetër, sipas të dhënave të Këshillit Gjyqësor të Kosovës, mbi 1.200 raste vazhdojnë të jenë në procedurë gjyqësore, ndërsa 909 janë zgjidhur në nëntë muajt e parë të këtij viti. Në gjykata figurojnë 899 raste të pranuara më 2026 dhe 1.216 raste të trashëguara, kurse mbi 74 për qind e rasteve të shqyrtuara kanë përfunduar me vendim fajësues.

Brenda pak ditësh në vend kanë ndodhur edhe dy raste tragjike, ku në Pejë, më 25 tetor, u vra Arlinda Zekaj nga i dyshuari dhe ish-kunati i saj, ndërsa në rastin e dytë në Gjilan, më 1 nëntor, u gjetën dy trupa të pajetë në fshatin Demiraj, babë e vajzë, për çka është arrestuar B.D. Sipas njohësve të shëndetit mendor, kjo çështje nuk po trajtohet në mënyrë serioze nga institucionet. Bind Skeja, njohës i politikave të shëndetit mendor, ka deklaruar se kurrizi i sistemit janë Qendrat e Shëndetit Mendor, të cilat janë shpesh të anashkaluara dhe pa mbështetje adekuate financiare, duke shtuar se shteti nuk ka plan apo dialog ndërmjet dikastereve.