Mbetjet ushqimore në Maqedoninë e Veriut tejkalojnë mesataren evropiane
Raporti i UNEP-it tregon se familjet në Maqedoninë e Veriut hedhin 86 kilogramë ushqim në vit për banor.
Familjet në Maqedoninë e Veriut hedhin mesatarisht 86 kilogramë ushqim në vit për banor, duke shënuar një shifër që është 17 kilogramë më shumë se mesatarja në Bashkimin Evropian. Ky tregues bëhet i ditur nga raporti i Programit të Kombeve të Bashkuara për Mjedisin (UNEP) për Indeksin e Mbetjeve Ushqimore. Krahasuar me vendet e tjera, familjet evropiane krijuan 69 kilogramë mbetje ushqimore për person, ndërsa në Maqedoninë e Veriut kjo sasi arriti në 86 kilogramë për person. Përveç familjeve, niveli i mbetjeve ushqimore në vend rezulton të jetë mbi mesataren evropiane edhe në restorante dhe në sektorin e shitjes me pakicë.
Sipas raportit të UNEP-it, në vitin familjet në Maqedoninë e Veriut krijuan gjithsej 179.311 tonë mbetje ushqimore. Ndërkohë, restorantet krijuan 51.283 tonë mbetje ose rreth 25 kilogramë për person në vit, kurse në sektorin e shitjes me pakicë u krijuan gjithsej 30.755 tonë mbetje ushqimore ose nga 15 kilogramë për person në vit. Në raport theksohet se familjet në Maqedoninë e Veriut krijojnë 17 kilogramë mbetje ushqimore për person më shumë se mesatarja evropiane, ndërsa restorantet dhe shërbimet e ushqimit prodhojnë nga 10 kilogramë mbi mesataren evropiane. Në shitjen me pakicë, shifra tregon se krijohen 5 kilogramë më shumë mbetje ushqimore për person në vit. Në shkallë globale, Indeksi i Mbetjeve Ushqimore evidenton se në mbarë botën hidhen çdo vit 1,05 miliardë tonë ushqim, sasi kjo që përfaqëson 19 për qind të të gjithë ushqimit të vënë në dispozicion të konsumatorëve.
Në nivel të Bashkimit Evropian, sipas të dhënave të Eurostatit, çdo qytetar gjeneroi rreth 129 kilogramë mbetje ushqimore, që paraqet rritje prej 0,7 për qind krahasuar me periudhën e mëparshme. Ndërkaq, në Maqedoninë e Veriut mungon një statistikë zyrtare e dedikuar vetëm për sasinë e ushqimit të hedhur, pasi matet vetëm sasia e përgjithshme e mbetjeve organike të mbledhura, ku përfshihen ushqimi, gjethet dhe mbetje të ngjashme. Të dhënat e Entit Shtetëror të Statistikës tregojnë se sasia vjetore e mbetjeve komunale të krijuara për banor ishte 417 kilogramë, që përbën një rënie prej 4,8 për qind krahasuar me sasinë e njëjtë të periudhës paraprake.
Burimet: Tetova Sot; Albeu; Bota Sot; Telegrafi; Almakos (klaster 7 outlets).