Marrëveshja VV-LDK për Sejdiun s’e garanton zgjedhjen e presidentit

Marrëveshja mes Lëvizjes Vetëvendosje dhe Lidhjes Demokratike të Kosovës nuk e garanton zgjedhjen e Bekim Sejdiut president, pavarësisht se palët i kanë numrat si të plota në Kuvend. I propozuari nga dy partitë nuk e ka mbështetjen e gjashtë deputetëve të LDK-së, ndërkohë që kryetari i Lëvizjes Vetëvendosje, Albin Kurti, ka deklaruar se vullnetin për zgjedhjen e presidentit e kanë shndërruar në marrëveshje me emrin e përveçëm të profesor Bekim Sejdiut.

Avdullah Hoti, Hykmete Bajrami, Arben Gashi, Janina Ymeri, Armend Zemaj e Kujtim Shala kanë dalë kundër marrëveshjes, e cila u mbështet nga Kryesia e partisë. Në një konferencë për media pas mbledhjes së Grupit Parlamentar të LDK-së, kryetari i këtij subjekti, Lumir Abdixhiku, i fajësoi këta deputetë se po e çojnë Kosovën drejt zgjedhjeve të reja. Albin Kurti nuk pranoi të komentojë votat kundër të gjashtë deputetëve, duke theksuar se qëndrimin do ta japin pas mbledhjes me deputetët e Vetëvendosjes.