Pse Maqedonia e Veriut rrezikon kolaps demografik deri në vitin 2032?
Sipas strategjisë së re për zhvillim rajonal, popullsia mund të bjerë nën 1.6 milionë banorë nëse anëtarësimi në BE vonohet.
— Maqedonia e Veriut përballet me një rrezik serioz për kolaps demografik, ku popullsia pritet të bjerë nën pragun e 1.6 milionë banorëve brenda pesë viteve të ardhshme. Sipas Strategjisë së rishikuar për Zhvillim Rajonal 2021–2031, numri i banorëve në vitin 2032 parashikohet të arrijë në 1.588.524, duke shënuar një ulje prej 13.5% krahasuar me vitin 2021.
Dokumenti, i cili i është dorëzuar Kuvendit, paralajmëron se vendi mund të humbasë deri në 22.500 qytetarë çdo vit nëpërmjet një eksodi emigrues që nuk po ndalet. Për këtë vit, projeksionet tregojnë se popullsia do të bjerë në 1.748.858 banorë, një rënie e ndjeshme ndaj vitit të kaluar.
Analiza prezanton një "skenar regresiv", ku vonesa e anëtarësimit në Bashkimin Evropian do të përshpejtojë zbrazjen e zonave rurale. Kjo ndodh pasi popullsia në moshë pune vazhdon të shpërngulet drejt qendrave urbane ose jashtë vendit, duke krijuar një kombinim fatal me rënien e shkallës së natalitetit.
Në anën tjetër, skenari optimist parashikon se një anëtarësim i shpejtë në BE do të zbutte depopullimin përmes krijimit së një klime ekonomike më të favorshme. Investimet e mëdha do të stimulonin punësimin dhe do të krijonin kushte për të tërhequr popullsinë e jashtme, duke përmirësuar saldoja migratore të vendit.
Kërcënimi më i madh mbetet "plakja" e popullsisë, e cila do të ndryshojë tërësisht hartën demografike të shtetit. Projeksionet tregojnë se pjesëmarrja e personave mbi 65 vjeç do të rritet mbi 34% deri në vitin 2055, ndërsa numri i personave mbi 80 vjeç do të rritet gjashtëfish krahasuar me gjendjen e vitit 2024.
Kjo rënie drastike e popullsisë në moshë pune, që pritet të zvogëlohet me gati gjysmë milioni persona, do të shtojë presionin mbi financat publike. Enti i Statistikës konfirmon këtë krizë, duke raportuar se në 66 komuna ekziston një shtim natyror negativ, ku numri i vdekjeve është më i lartë se ai i lindjeve.
Rënia e lindjeve të gjalla me 4.1% në nivel vjetor reflekton emigrimin e popullsisë në moshë riprodhuese. Pa një integrim të shpejtë evropian, Maqedonia e Veriut rrezikon të humbasë kapitalin njerëzor të saj, duke u kthyer në një shtet me një popullsi të moshuar dhe me kapacitete ekonomike të kufizuara.
Burim: Portalb
— Redaksia ZHURMA