Si do të ndryshojë dhurimi i organeve në Maqedoninë e Veriut?
Pse pushteti dhe opozita arritën konsensus për procedurën e shkurtuar të ligjit të ri?
— Ministri për Shëndetësi në Maqedoninë e Veriut, Azir Aliu, deklaroi se pushteti dhe opozita janë bashkuar për miratimin e ndryshimeve ligjore që synojnë marrjen dhe transplantimin e organeve të njeriut për qëllime mjekësore. Aliu theksoi se Kuvendi dërgoi një mesazh uniteti duke votuar për procedurën e shkurtuar të miratimit, pasi jetët e qytetarëve qëndrojnë mbi ndarjet politike.
Ministri u shpreh se do të jetë i pari që do të regjistrohet si dhurues organesh, duke kërkuar një fushatë të gjerë ndërgjegjësimi. Sipas tij, në këtë proces duhet të përfshihen mjekët, shkollat, shoqatat dhe bashkësitë fetare për të rritur numrin e donatorëve dhe për të promovuar humanizmin dhe dinjitetin.
Ndryshimet e ligjit parashikojnë që deklarimi i dhurimit të organeve të bëhet përmes një moduli të ri digjital në sistemin „Termini im“. Ky proces do të jetë i sigurt dhe me verifikim të dyfishtë, duke u dhënë mundësi çdo qytetari që ta ndryshojë ose ta tërheqë vendimin e tij në çdo kohë.
Ky hap vjen në një kohë kur shëndetësia në Maqedoninë e Veriut ka shënuar disa arritje teknike. Në janar të vitit 2025-të, për herë të parë në Klinikën për Sëmundje Ortopedike u transplantua kocka e një donatori të vdekur në dy gishta të një fëmije 13-vjeçar me brakidaktili.
Më mëparë, në të njëjtën klinikë në Shkup, u realizua transplantimi i parë i ligamenteve nga një donator i vdekur. Gjithashtu, një pacient 34-vjeçar me dëmtim serioz në gjurin e djathtë mori transplant të indeve të buta, duke dëshmuar progresin e procedurave të transplantimit nga donatorët e vdekur në vend.
Burim: Portalb
— Redaksia ZHURMA