Kush po i shtyn të rinjtë në Maqedoni drejt dhunës?

— Mungesa e aktivitetit fizik dhe shpenzimi i tepërt i kohës në rrjetet sociale janë faktorët kryesorë që po i çojnë të rinjtë në Maqedoni drejt dhunës në mes të tyre. Psikologia Ajla Bilalli shpjegon se ky proces reflekton një nevojë të dëshiruar për të qenë më i forti dhe për të fituar favore në shoqëri.

Sipas Bilallit, vetë personi që ushtron dhunën duhet të trajtohet si një rast për trajtim psikologjik. Ajo argumenton se dhunuesi në të kaluarën e tij ka qenë shpesh viktimë e dikujt tjetër, duke krijuar një cikël agresioni që reflektohet në sjelljen e tij aktuale ndaj bashkëmoshatarëve.

Përballja me këtë fenomen kërkon një bashkëpunim të ngushtë ku roli kryesor i takon familjes përmes dëgjimit dhe kujdesit për anën emocionale të fëmijëve. Pas familjes, Bilalli vë në dukje se kyçet shkollat, Qendrat e Shëndetit Mendor dhe institucionet e tjera kompetente për të ndalur këto tendenca.

Shifrat e UNICEF-it për Maqedoninë e Veriut janë alarmante: 23% e të rinjve të moshës 13 deri në 15 vjeç kanë raportuar bullizëm nga bashkëmoshatarët gjatë muajve të fundit. Gjithashtu, raportet institucionale regjistrojnë qindra raste të fëmijëve që kanë qenë viktima të dhunës seksuale.

Më problematike është dhuna brenda shtëpisë, ku më shumë se dy të tretat e fëmijëve të moshës 1 deri në 14 vjeç përjetojnë disiplinë të dhunshme, përfshirë agresionin psikologjik dhe ndëshkimin fizik. UNICEF kërkon forcimin e mbrojtjes ligjore, trajnimin e stafit shkollor dhe rritjen e sigurisë në hapësirën online.

Burim: TV21
— Redaksia ZHURMA