Baton Zabërgja kontribuon me asistim në fitoren e Kharkivit kundër Epitsentrit

Futbollisti i Kombëtares së Kosovës, Baton Zabërgja, ka vazhduar paraqitjet e mira në elitën e futbollit ukrainas, duke dhënë një asistim në fitoren që Kharkivi e arriti si mysafir me rezultatin 2-1 kundër Epitsentrit, në kuadër të javës së dhjetë. Kontributi i sulmuesit nga Vushtrria erdhi në minutën e 48-të, kur ai shërbeu Ramik Gadzhyevin, i cili zhbllokoi shifrat duke kaluar skuadrën e tij në epërsi.

Zabërgja, 25-vjeçar, luajti përgjatë gjithë takimit, ndërsa në fushë u përfshi edhe bashkëlojtari i tij, Ermir Rashica, i cili u inkuadrua në minutën e 81-të. Nga ana tjetër, te skuadra e Epitsentrit, Serjan Repaj luajti në të gjitha minutat e ndeshjes. Për Zabërgjën ky ishte asistimi i dytë këtë sezon në kampionat, ku ka shënuar gjithashtu gjashtë gola, ndërsa në Kupën e Ukrainës ka realizuar dy gola dhe tri asistime.

Siç raportoi Zhurma më 19 tetor 2026, sulmuesi i Kosovës kishte shënuar golin e gjashtë në Superligën e Ukrainës në një tjetër fitore të Kharkivit.