Flakët përfshijnë një automjet në aksin rrugor Fier-Ballsh

FIER — Një automjet tip «Ford» është përfshirë nga flakët në aksin rrugor Fier-Ballsh, në afërsi të fshatit Lalar. Drejtuesi i mjetit ka arritur të dalë në kohë sapo ka konstatuar flakët dhe për pasojë nuk ka pësuar lëndime. Në vendngjarje kanë ndërhyrë shërbimet zjarrfikëse të Patosit, të cilat kanë bërë të mundur shuarjen e zjarrit. Nga të dhënat paraprake dyshohet se shkak i ngjarjes ka qenë një defekt në sistemin elektrik të automjetit, ndërsa policia dhe grupi hetimor po vijojnë punën për përcaktimin e rrethanave dhe shkaqeve të plota.