MABCO e Pacollit shkon në arbitrazh për Aeroportin e Vlorës

VLORË — Kompania MABCO e biznesmenit Behgjet Pacolli paralajmëroi se do ta ankojë vendimin e Qeverisë për zgjidhjen e kontratës koncesionare të Aeroportit Ndërkombëtar të Vlorës, duke ndjekur çështjen në arbitrazh ndërkombëtar pasi Ministria e Infrastrukturës nisi procedurat për mosrespektimin e afateve.

Pacolli shpalli në rrjetet sociale se kompania nuk ka marrë asnjë njoftim zyrtar nga Ministria për këtë vendim dhe akuzoi autoritetet shqiptare se po e çojnë vetë çështjen drejt arbitrazhit. "Për një investim strategjik të kësaj rëndësie, është e papranueshme që investitori të informohet nga mediat dhe jo nga institucionet e shtetit," deklaroi ai.

Sipas Pacollit, MABCO ka investuar mbi 320 milionë euro në projekt dhe kishte përmbushur pothuajse të gjitha detyrimet kontraktore, duke qenë pranë fazës së certifikimit të aeroportit. Kompania pretendon se ka tentuar vazhdimisht të zgjidhë mosmarrëveshjet përmes dialogut institucional, por këto përpjekje janë penguar nga neglizhenca e zyrtarëve.

Gjykata e Lartë i riktheu MABCO Construction të drejtën e administrimit të aeroportit, megjithatë kompania nuk u lejua të hynte në kantier për muaj me radhë pas konfliktit me punonjësit e partnerit Valon Ademi. Sipas kontratës, punimet duhej të përfundonin në shkurt 2026, por nuk u mbyllën as pas afatit shtesë 30-ditor.

Ministria e Infrastrukturës nisi kështu procedurat për zgjidhjen e kontratës. Deri tani, kompania 2A Group e Valon Ademit nuk ka dhënë reagim publik për çështjen.

Burim: Top Channel
— Redaksia ZHURMA