Si ndryshuan forcat politike në 38 komuna sipas analizës së KDI-së?
Analiza e KDI-së: Vetëvendosje zhvlerësohet kudo, por mban 31 kryesi; LDK rritet në 35 komuna, AAK në 30.
PRISHTINË — Eugen Cakolli nga KDI-ja ka publikuar një analizë krahasuese të rezultateve preliminare të zgjedhjeve të fundit me ato të 28 dhjetorit 2025, duke evidentuar ndryshime të rëndësishme në mbështetjen elektorale të partive politike në nivel komunal. Sipas tij, përveç rënies së numrit të përgjithshëm të votave për shkak të pjesëmarrjes më të ulët të qytetarëve, të dhënat tregojnë lëvizje të dukshme në përqindjet e votave.
Cakolli thekson se Lëvizja Vetëvendosje ka regjistruar rënie të përqindjes së votave në të gjitha 38 komunat e Kosovës. Edhe pse vazhdon të jetë forca e parë politike në 31 komuna, partia ka humbur mbështetje në secilën prej tyre dhe nuk mban më pozitën e parë në tri komuna. Rëniet më të mëdha të LVV-së janë evidentuar në Suharekë, Mamushë, Junik dhe Rahovec.
Ndërkohë, Lidhja Demokratike e Kosovës ka shënuar rritje të përqindjes së votave në 35 komuna, me rritjet më të mëdha në Istog, Malishevë, Junik, Suharekë dhe Rahovec. Aleanca për Ardhmërinë e Kosovës ka rritur përqindjen në 30 komuna, megjithëse modeste në shumicën e tyre; avancimi më i madh në Suharekë, Deçan, Rahovec, Junik dhe Gjakovë.
Sa i përket Partisë Demokratike të Kosovës, Cakolli vlerëson se ka ruajtur stabilitet më të madh krahasuar me rivalët, me ndryshime relativisht të vogla në shumicën e komunave dhe rritjen më të theksuar në Malishevë.
Burim: Zëri
— Redaksia ZHURMA