Lushaku Sadriu: Gjermania kërkon shmangien e krizave që bllokojnë Kosovën

Deputetja e Lidhjes Demokratike të Kosovës, Jehona Lushaku Sadriu, ka deklaruar se Gjermania mbetet partnere dhe mbështetëse e Kosovës në procesin e integrimit evropian. Ajo ka theksuar se kërkesat e këtij shteti janë të njëjta me kriteret e Bashkimit Evropian, ndërsa pret që vendi të shënojë përparim dhe të shmangë krizat politike që mund ta bllokojnë atë.

«Ata janë me të gjitha kapacitetet e veta në mbështetje të Kosovës. Normalisht që kërkesat i kanë që ne të ecim përpara, të mos prodhojmë ikje të përgjegjësisë edhe kriza politike të tjera që e bllokojnë vendin», u shpreh ajo, duke shtuar se përgjegjësia për përmbushjen e kritereve i takon Qeverisë.

Siç raportoi Zhurma më 5 nëntor 2026, Lushaku-Sadriu kishte kritikuar rezultatet e Kosovës në raportin e fundit të Bashkimit Evropian nga foltorja e Kuvendit, duke e cilësuar atë si më të dobëtin historikisht.