Pse kërkon LSDM referendum dhe çfarë thotë VMRO-DPMNE për identitetin?
Përplasja mes opozitës dhe pushtetit në Shkup përshkallëzohet mbi çështjen e kompromisit me Bullgarinë për BE.
SHKUP — Opozitarja LSDM i ka bërë thirrje Qeverisë të shpallë referendum ku qytetarët vetë do të vendosin për të ardhmen evropiane të vendit, pasi kryeministri Hristijan Mickoski deklaroi se nuk ka më hapësirë për lëshime identitare pavarësisht kostos në rrugën eurointegruese.
"Qytetarët vetë duhet të vendosin nëse janë të gatshëm ata, familjet e tyre dhe fëmijët e tyre të paguajnë çmimin e politikave të gabuara të Mickoskit", tha Bogdanka Kuzeska, zëdhënëse e LSDM-së, duke akuzuar pushtetin se i mban peng qytetarët me politika kundër integrimit evropian, me pretekstin se Europa po cenon identitetin maqedonas. Kuzeska shtoi se "pushteti thotë se nuk ka para për referendum, por vetëm për tenderë kriminalë".
VMRO-DPMNE i është përgjigjur LSDM-së me akuza më të rënda. "VMRO-DPMNE nuk do të lejojë bullgarizimin e figurave historike që kanë krijuar, që kanë shkrim-lexuar rajonin dhe që kanë luftuar për të krijuar shtetin maqedonas", tha Valentin Manasievski, zëdhënës i partisë në pushtet. Sipas tij, LSDM është e gatshme të bëjë ndryshime kushtetuese e më pas "redefinim të historisë dhe identitetit, krejt kjo në interes të Bullgarisë".
Qeveria e hodhi poshtë kërkesën për referendum, duke thënë se "nuk duhen harxhuar kohë dhe paratë e qytetarëve" dhe se hapja e fondeve nga Agjenda Reformuese dhe orientimi drejt BE-së "tregojnë qartë rrugën evropiane të vendit".
Burim: TV21
— Redaksia ZHURMA