Lista Serbe kërkon forcimin e KFOR dhe EULEX para vendimit të Hagës

Lista Serbe u ka bërë thirrje KFOR-it dhe EULEX-it të marrin të gjitha masat e nevojshme për të garantuar paqen, sigurinë dhe stabilitetin në Kosovë, veçanërisht në ditët para shpalljes së aktgjykimit ndaj ish-krerëve të UÇK-së.

Në një komunikatë, partia kërkon që prania e misioneve ndërkombëtare të sigurisë të rritet në mjediset e përziera, me theks të veçantë në vendbanimet serbe në jug të Ibrit, që të veprohet në mënyrë parandaluese dhe të parandalohen incidente që të rrezikojnë sigurinë e qytetarëve dhe rendin publik.

Lista Serbe pret gjithashtu që KFOR-i dhe EULEX-i, brenda kompetencave të tyre, të kërkojnë Policisë së Kosovës të kryejë detyrat e saj në mënyrë profesionale, të përgjegjshme, të paanshme dhe ekskluzivisht në përputhje me ligjin, duke respektuar të drejtat e të gjithë qytetarëve.

Partia thekson nevojën për masa të shtuara parandaluese në prag të 16 shtatorit, datës kur është paralajmëruar shpallja e aktgjykimit në Hagë, me qëllim shmangjen e tensioneve dhe provokimeve. Lista Serbe therret serbët dhe të gjithë qytetarët të ruajnë qetësinë dhe të mos ndikohen nga provokimet eventuale.