Liderët fetarë të 7 vendeve europiane nisin dialogun në Tiranë
Forumi i organizuar nga Religions for Peace dhe Këshilli Ndërfetar i Shqipërisë synon të kthejë bashkëjetesën në projekte konkrete për të rinjtë.
TIRANË — Përfaqësues të këshillave ndërfetarë, komuniteteve fetare, institucioneve publike dhe shoqërisë civile nga shtatë vende europiane janë mbledhur në kryeqytetin shqiptar për të diskutuar mbi dialogun ndërfetar dhe paqen globale. Ky takim zhvillohet në kuadër të Forumit Europian Ndërfetar dhe Dialogut Rajonal Shumëpalësh të titulluar 'Lulëzimi i Përbashkët Shpirtëror'.
Aktiviteti i organizuar në Sallën e Muzeut të Kryegjyshatës Botërore Bektashiane ka bërë bashkë delegatë nga Shqipëria, Bosnja, Finlanda, Gjermania, Greqia, Italia dhe Spanja. Ky organizim vjen si rezultat i bashkëpunimit mes strukturave të Religions for Peace dhe Këshillit Ndërfetar të Shqipërisë, me synim forcimin e respektit dhe drejtësisë sociale.
Kryegjyshi Botëror i Bektashinjve, Haxhi Dede Edmond Brahimaj, deklaroi se Shqipëria shërben si një shembull i gjallë ku harmonia ndërfetare është trashëguar ndër breza si një traditë jetike. Ai vuri në dukje se ky forum nuk është vetëm një seri diskutimesh teorike, por një udhëtim i përbashkët drejt veprimeve konkrete.
Ndërkohë, kreu i Komunitetit Mysliman të Shqipërisë, Bujar Spahiu, kërkoi investime më të mëdha te rinia dhe mbrojtja e mjedisit, duke theksuar se zhvillimi i njeriut nuk matet vetëm me mirëqenien materiale. Sipas tij, dialogu i vërtetë kërkon respektimin e dinjitetit të tjetrit pa pasur nevojë të braktisen bindjet fetare.
Në emër të komunitetit ortodoks, Kryepeshkopi Joani rikujtoi se emri i Perëndisë nuk mund të përdoret kurrë për të përligjur urrejtjen ose dhunën. Gjithashtu, Presidenti i Konferencës Ipeshkvore të Shqipërisë, Gjergj Meta, dhe Pastor Erion Sylari bënë thirrje për mbrojtjen e të shenjtës brenda çdo njeriu dhe ndërtimin e urave të mirëkuptimit.
Përfaqësuesi i Komitetit Shtetëror për Kultet, Klodjan Bulku, konfirmoi mbështetjen e shtetit shqiptar për nismat që nxisin bashkëjetesën ndërmjet besimeve fetare. Ky forum pesëditor, që përfshin edhe vizita studimore në qytetet e Krujës, Shkodrës dhe Durrësit, synon që në fund të hartojë plane konkrete kombëtare për përfshirjen aktive të grave dhe të rinjve.
Sekretarja Deepika Singh dhe Genti Kruja nga Religions for Peace theksuan se ky takim duhet të shënojë kalimin nga thjesht bashkëjetesa në veprim të koordinuar. Pjesëmarrësit do të shërbejnë si ambasadorë të kësaj metode në vendet e tyre për të nxitur politika të reja të harmonisë sociale dhe shërbimit ndaj njerëzimit.
Burim: Top Channel
— Redaksia ZHURMA