Pse Kuvendi shpall tender 202 mijë euro për ushqim e pije pa qenë i konstituar?

PRISHTINË — Administrata e Kuvendit të Kosovës ka nisur procedurat për një tender të ri prokurimi publik për shërbimet e hotelerisë, në një kohë kur institucioni vazhdon të mos jetë i konstituar plotësisht. Kontrata, me vlerë të parashikuar prej 202 mijë eurosh, synon të mbulojë nevojat e Kuvendit për një periudhë prej 36 muajsh.

Institucioni aktualisht drejtohet nga ushtruesja e detyrës së kryetares, Albulena Haxhiu. Operatorët ekonomikë kanë afat deri më 5 gusht 2026 për të dorëzuar ofertat e tyre për furnizimin me pije të ftohta, pije të ngrohta dhe ushqim, sipas kërkesave të institucionit gjatë kohëzgjatjes së kontratës.

Pjesa më e madhe e buxhetit është dedikuar pijet e ngrohta, ku janë planifikuar 111 mijë e 100 euro, që përbëjnë 55 për qind të kontratës. Lista e produkteve përfshin kafe turke, espresso, makiato, kapuçino, kafe amerikane, nes-kafe, qumësht me çokollatë Bambi dhe çajra filtër të llojeve të ndryshme.

Pijet e ftohta zënë 40 për qind të tenderit, me një vlerë prej 80 mijë e 800 eurosh. Kjo kategori përfshin pije në kanaçe si Coca-Cola, Fanta, Sprite, Bitter Lemon, Tonik, Schweppes, çaj të ftohtë, lëngje frutash në ambalazh qelqi me shije të ndryshme, si dhe ujë natyral e i gazuar.

Grupi i ushqimit, ndonëse me vlerën më të vogël financiare prej 10,100 eurosh, përmban një menu me afro 30 produkte. Në të figurojnë supa, sallata të ndryshme, omëleta, makarona bolonjeze, sanduiçë, pica shtëpiake e margarita, file pule me garniturë, si dhe verëra vendore e të importit.

Kuvendi do t'i ofrojë operatorit fitues lehtësira të konsiderueshme, duke e liruar atë nga shpenzimet e qirasë, ujit, energjisë elektrike, ngrohjes dhe telefonit. Gjithashtu, institucioni do të vërë në shfrytëzim pajisjet dhe inventarin e restorantit që janë në pronësi të Kuvendit, duke kërkuar që këto të reflektohen në çmimet e ofertuara.

Kontrata do të jetë e tipit kornizë dhe furnizimet nuk do të bëhen automatikisht, por vetëm pas lëshimit të urdhërblerjes nga Autoriteti Kontraktues. Kompanitë aplikante duhet të dëshmojnë se nuk kanë borxhe tatimore apo detyrime të papaguara ndaj sigurimeve sociale, në përputhje me Ligjin për Prokurimin Publik.

Burim: Lajmi.net
— Redaksia ZHURMA