Kuvendi i LDK-së voton sot shkarkimin e Abdixhikut
Seanca e jashtëzakonshme e 354 delegatëve do të zhvillohet në orën 18:00; për vendim duhen më shumë se gjysma e anëtarëve dhe shumica e të pranishmëve.
PRISHTINË — Sot në orën 18:00 në periferi të Prishtinës do të mblidhet Kuvendi i Lidhjes Demokratike të Kosovës për të votuar mbi kërkesën e shkarkimit të kryetarit të partisë, Lumir Abdixhikut. Mbledhja është thirrur si e jashtëzakonshme pas kërkesës së rreth 150 delegatëve.
Sipas Statutit të LDK-së, Kuvendi përbëhet nga 354 delegatë, plus kryetari i partisë. Pika 1 e Nenit 20 thotë se vendimet e Kuvendit janë të plotfuqishme vetëm nëse marrin pjesë më shumë se gjysma e anëtarëve të zgjedhur, dhe nëse 'për' votojnë shumica e të pranishmëve.
Pika 2 e të njëjtit nen përcakton se votimi në Kuvend bëhet i hapur. Shkarkimi i Abdixhikut mbetet pika e vetme e rendit të ditës.
Burim: Gazeta Metro
— Redaksia ZHURMA