Çfarë kushtëzime i vunë partitë opozitare LVV-së për formimin e institucioneve?

PRISHTINË — Lëvizja Vetëvendosje, partia fituese e zgjedhjeve të 7 qershorit, pret certifikimin e rezultatit për të filluar formimin e institucioneve të reja, por partitë e opozitës kanë paraqitur kushtëzime për bashkëpunim. Aleanca për Ardhmërinë e Kosovës (AAK) ka kërkuar plotësimin e gjashtë pikave për të mundësuar kuorumin për zgjedhjen e presidentit.

Avni Arifi, anëtar i AAK-së, deklaroi se partia e tyre është e gatshme të mbështesë stabilitetin institucional, por jo përmes bashkëqeverisjes me LVV-në. "Aleanca nuk i nënshtrohet askujt për asnjë çmim. Ne kemi bindjet tona dhe vizionin tonë, por jemi të gatshëm të shkojmë një hap më tej nëse marrim fuqinë politike që na takon," tha Arifi.

Ndër kushtet e paraqitura nga AAK-ja janë orientimi strategjik dhe projekti i gazit amerikan. Arifi theksoi se partia e tyre ofron "bllanko mbështetje" për LVV-në në këmbim të zbatimit të këtyre pikave, duke përfshirë edhe uljen e pragut të TVSH-së dhe sigurimin e gazit amerikan.

Përfaqësues të LVV-së, nga ana tjetër, kanë deklaruar se kushtëzimet duhet të trajtohen në kuadrin e programit qeverisës. Ata theksuan se çështja e gazit amerikan nuk duhet të shfrytëzohet për beteja politike të brendshme. Mimoza Kusari-Lila, kryetare e Alternativës, vuri në dukje se qëndrimet e ndryshme brenda partive e vështirësojnë themelimin e institucioneve.

"Në momentin e certifikimit të rezultateve, duhet të fillojë komunikimi zyrtar. Kryeministri Albin Kurti, si drejtues i partisë më të madhe, duhet të marrë iniciativën. Kryetarët e partive duhet të prezantojnë qëndrimet zyrtare të partisë dhe të grupit të deputetëve," tha Kusari-Lila, duke shtuar se situata është më e ndërlikuar sesa në zgjedhjet e kaluara.

Certifikimi i rezultatit të zgjedhjeve pritet të bëhet pas përfundimit të afatit për ankesa. Aktualisht, në Gjykatën Supreme janë dy ankesa të kandidatëve të PDK-së, Bekim Haxhiu dhe Qëndrim Kryeziu, të cilët kërkojnë rinumërimin e plotë të votave. Njohës të proceseve zgjedhore vlerësojnë se, nëse nuk kërkohet veprim tjetër nga KQZ-ja, certifikimi mund të bëhet deri në fund të kësaj jave.

"Certifikimi duhet të ndodhë brenda afateve ligjore. Nëse Gjykata Supreme nuk kërkon veprime shtesë, atëherë mund të bëhet edhe më herët," deklaroi Qemajl Marmullakaj nga Instituti i Kosovës për Drejtësi. Rezultatet përfundimtare të zgjedhjeve u shpallën më 27 qershor.

Burim: RTV21
— Redaksia ZHURMA