Pse Kushtetuesja e dënoi Gjykatën Themelore për vonesën 10-vjeçare të rastit Prishtina?
Gjykata Kushtetuese konstatoi shkelje të së drejtës për gjykim brenda afatit të arsyeshëm në procedurën penale që zgjat që nga viti 2014.
PRISHTINË — Gjykata Kushtetuese e Republikës së Kosovës ka publikuar aktgjykimin në rastin KI200/24, të parashtruar nga Mehmet Prishtina, duke konstatuar shkelje të së drejtës për gjykim brenda afatit të arsyeshëm.
Me vendim unanim, Kushtetuesja e shpalli kërkesën të pranueshme dhe vlerësoi se është shkelur e drejta e garantuar me nenin 31 të Kushtetutës dhe nenin 6 të Konventës Evropiane për të Drejtat e Njeriut. Ajo urdhëroi Gjykatën Themelore në Prishtinë — Departamenti Special të veprojë me prioritet për përfundimin e procedurës penale PPKR. nr. 130/16 dhe nxjerrjen e një vendimi meritor.
Rasti lidhet me procedurën penale të nisur në vitin 2014 ndaj Mehmet Prishtinës dhe 22 të pandehurve të tjerë, të dyshuar për krim të organizuar, përvetësim të kundërligjshëm të pronës shoqërore, pastrim parash, shmangie tatimore dhe falsifikim dokumentesh. Aktakuza u ngrit më 3 mars 2016, por procedura ende nuk kishte përfunduar në shkallë të parë kur Kushtetuesja mori çështjen.
Në arsyetim, Gjykata vlerësoi se procedura kishte zgjatur 10 vjet, 6 muaj e 3 ditë — periudhë që konsiderohet e tepruar edhe duke pasur parasysh kompleksitetin e çështjes, numrin e madh të të pandehurve dhe volumin e provave. Sipas Gjykatës, kompleksiteti "nuk mund të justifikojë mungesën e një vendimi në shkallë të parë pas më shumë se një dekade."
Kushtetuesja i cilësoi të parakohshme pretendimet e Prishtinës për parashkrimin e disa veprave penale dhe bllokimin e aseteve, pasi procedura ende është në zhvillim. Ajo refuzoi edhe kërkesën për moszbulim identiteti, për mungesë arsyetimi.
Burim: Zëri
— Redaksia ZHURMA