Shiroka-Pula: Zbulimi i hershëm i kancerit të gjirit shpëton jetë
Qendra JETA-VITA shënon 20-vjetorin e ecjes simbolike për gratë e prekura nga kanceri i gjirit.
Redaksia ZHURMA · · 1 min lexim
Qendra Kosovare për Luftimin e Kancerit të Gjirit, JETA-VITA, ka organizuar manifestimin tradicional në kuadër të 20-vjetorit të ecjes simbolike në mbështetje të grave të prekura nga kanceri i gjirit. Në këtë ngjarje, pjesëmarrësve iu drejtuan presidentja e Kosovës, Justina Shiroka-Pula, ministri i Shëndetësisë, Arben Vitia, si dhe drejtori i Klinikës së Onkologjisë, Ilir Kurtishi.
«Sot jemi bashkë për ta përcjellë mesazhin e qartë: se zbulimi i hershëm shpëton jetë», ka deklaruar Shiroka-Pula, duke shtuar se sipas të dhënave të Klinikës së Onkologjisë, çdo vit në Kosovë identifikohen rreth 450 deri në 460 gra me kancer të gjirit. Ajo theksoi se mamografia ofrohet falas në institucionet publike shëndetësore dhe se përmes mamografive mobile shërbimet po afrohen edhe në komunat ku mungojnë këto pajisje.
Nga ana e tij, ministri Arben Vitia vlerësoi lart punën e profesionistëve shëndetësorë dhe kontributin e grave që kanë ndarë përvojat e tyre, duke theksuar se përkushtimi i punonjësve shëndetësorë përfshin gjithashtu mbështetjen emocionale dhe komunikimin me pacientet.
