Kurti uron sportistët për Lojërat Mesdhetare Taranto 2026
Kryeministri në detyrë Albin Kurti ka shprehur mbështetjen për sportistët kosovarë para Lojërave Mesdhetare.
PRISHTINË — Kryeministri në detyrë, Albin Kurti, ka shprehur mbështetjen e tij për sportistët kosovarë që do ta përfaqësojnë vendin në Lojërat Mesdhetare “Taranto 2026”.
Kurti ka thënë se pas çdo paraqitjeje dhe fitoreje të sportistëve qëndrojnë vite punë, disiplinë dhe sakrificë, duke vlerësuar rezultatet e Kosovës në arenën ndërkombëtare, pavarësisht madhësisë së vendit. Ai ka theksuar se një brez i ri sportistësh është gati të shkruajë një kapitull të ri të sportit kosovar, ndërsa ka falënderuar trajnerët, federatat, Komitetin Olimpik të Kosovës, familjet dhe të gjithë ata që i mbështesin sportistët.
Kurti u ka bërë thirrje sportistëve të garojnë me besim dhe përkushtim, duke nënvizuar se mënyra se si luftohet për fitoren është po aq e rëndësishme sa vetë rezultati. “Shkoni me krenari dhe jepni më të mirën tuaj”, ka qenë mesazhi i Kurtit, i cili u ka uruar sukses sportistëve, duke shpresuar që flamuri i Kosovës të ngrihet në podium edhe me medalje.