Kurti kërkon nga BE-ja dhe SHBA-ja deklasifikimin e dokumentacionit të krimeve të luftës

PRISHTINË — Kryeministri në detyrë, Albin Kurti, i ka bërë thirrje Bashkimit Evropian dhe Shteteve të Bashkuara të Amerikës që të ushtrojnë presion ndaj Serbisë për deklasifikimin e dokumentacionit që lidhet me krimet e luftës në Kosovë. Gjatë vizitës së sotme në Kalludër të Vogël të Zubin-Potokut, Kurti ka thënë se Serbia po arreston persona që vite më parë kishin dëshmuar për krimet e luftës që janë kryer në Kosovë.

Sipas Kurtit, në Serbi po arrestohen njerëz nën akuza për spiunazh, vetëm pse para dy dekadash kishin informuar UNMIK-un dhe organizata të tjera ndërkombëtare për krimet e kryera nga forcat serbe në Kosovë. Ai përmendi edhe dosjen e Brigadës së Motorizuar 38 të Ushtrisë Jugosllave, për të cilën ka thënë se lidhet me masakrat e kryera në Kosovë, veçanërisht në Drenicë.

Kurti u bëri thirrje partnerëve ndërkombëtarë që të angazhohen për deklasifikimin e këtyre dokumenteve, duke theksuar se kjo është e domosdoshme për zbardhjen e fatit të personave të zhdukur. “I bëjmë thirrje edhe një herë ndërkombëtarëve, SHBA-së dhe BE-së, që këto dokumentacione të klasifikuara të deklasifikohen, të zbardhet e vërteta, në mënyrë që familjeve të mbi 1.500 personave të pagjetur t’u jepet fund ankthit dhe dhimbjes dhe të kenë mundësi t’i varrosin me dinjitet më të dashurit e tyre”, ka deklaruar Kurti.

Burim: Koha.net, https://www.koha.net/arberi/kurti-thirrje-be-se-dhe-shba-se-serbia-te-deklasifikoje-dokumentacionin-e-krimeve-te-luftes

— Redaksia ZHURMA