Kurti: Shqiptarët e Luginës do të kenë mbështetje politike dhe financiare

Kryeministri Albin Kurti ka thënë se Qeveria e Kosovës do të vazhdojë t'i mbështesë shqiptarët në Preshevë, Medvegjë dhe Bujanoc në aspektin politik, material dhe financiar. Sipas tij, qëllimi është që të sigurohet respektimi i të drejtave të tyre kombëtare, qytetare dhe njerëzore, duke ruajtur kontaktin e rregullt me përfaqësuesit e tyre.

Kurti ka mirëpritur bashkimin e subjekteve politike shqiptare në zgjedhjet e jashtëzakonshme në Serbi përmes një liste të përbashkët të quajtur “Koalicioni Shqiptar”. Ai ka përmendur gjithashtu diskriminimin dhe përfaqësimin e ulët të shqiptarëve në institucionet e Luginës, duke theksuar se gjatë një dekade nuk është punësuar asnjë polic i ri shqiptar në Preshevë, Medvegjë dhe Bujanoc, ndërsa në Spitalin e Vranjës, nga më shumë se një mijë e treqind punonjës, vetëm dy janë mjekë shqiptarë.

Mbështetja për Luginën e Preshevës synon financimin e projekteve dhe programeve që përmirësojnë pozitën e shqiptarëve, si dhe ruajtjen e gjuhës, kulturës dhe identitetit shqiptar. Vendimi bazohet në memorandumin e bashkëpunimit të nënshkruar ndërmjet Qeverisë dhe Këshillit Kombëtar Shqiptar.