Kurti i kërkon Policisë kontrolle të shtuara pas valës së aksidenteve
Në mbledhjen e qeverisë të mbajtur më 24 korrik, kryeministri u bëri thirrje edhe bashkatdhetarëve nga mërgata që të bëjnë kujdes gjatë udhëtimeve.
PRISHTINË — Kryeministri i Kosovës, Albin Kurti, ka kërkuar të premten nga Policia e Kosovës që të shtojë veprimet parandaluese ndaj shkelësve të rregullave të komunikacionit. Kjo kërkesë e kreut të qeverisë vjen si reagim ndaj numrit të madh të aksidenteve të regjistruara në rrugët e vendit gjatë ditëve të fundit.
Gjatë mbledhjes së Qeverisë më 24 korrik, Kurti u ka uruar mirëseardhje edhe pjesëtarëve të mërgatës që kanë ardhur për pushime në atdhe. Ai theksoi se prania e tyre e gjallëron secilën komunë të Kosovës, por njëkohësisht u bëri thirrje atyre dhe të gjithë shoferëve për kujdes maksimal gjatë ngasjes së automjeteve.
Kryeministri në detyrë nënvizoi se respektimi i rregullave të trafikut dhe angazhimi i shtuar i institucioneve të sigurisë janë të domosdoshme për rritjen e sigurisë rrugore. Ky reagim vjen në një kohë kur fluksi i automjeteve në rrugët e vendit është rritur ndjeshëm për shkak të sezonit veror.
Burim: Lajmi.net
— Redaksia ZHURMA