Kurti e Abdixhiku pajtohen në parim për Bekim Sejdiun president

Kryeministri në detyrë i Kosovës, Albin Kurti, dhe kryetari i Lidhjes Demokratike të Kosovës, Lumir Abdixhiku, janë pajtuar në parim që Bekim Sejdiu të jetë kandidat për President të Kosovës, sipas VOX Kosova. Sejdiu është ish-gjyqtar i Gjykatës Kushtetuese dhe ka qenë gjyqtari raportues në rastin KO95/20, që çoi në rrëzimin e Qeverisë së Avdullah Hotit.

Pajtimi u arrit në takimin e parafundit që Kurti dhe Abdixhiku patën të mërkurën, por nuk dihet nëse palët kanë lëvizur nga ky pozicion. Një numër i konsiderueshëm i deputetëve të LDK-së, duke filluar nga Avdullah Hoti, vështirë se do të votojnë për gjyqtarin që dikur ia rrëzoi Qeverinë.

Në mbrëmjen e së shtunës, Kurti e Abdixhiku u takuan pa paralajmërim dhe nuk u deklaruan për media. “Kur të kemi rezultate nga ana jonë, do të kemi lajme për juve”, tha Kurti për gazetarë. Kuvendi vazhdon të mbetet i pakonstituuar, ndonëse afati kushtetues ka kaluar që nga 7 gushti.