Rasti i vrasjes për borxh në Pejë kthehet në rigjykim për të tretën herë
I akuzuari për vrasjen e M.Z. në vitin 2017 për një borxh prej 77 mijë eurosh ishte dënuar me 19 vjet burgim nga Gjykata Themelore e Pejës.
PRISHTINË — Gjykata e Apelit ka miratuar ankesën e mbrojtjes dhe ka kthyer për të tretën herë në rigjykim rastin e Kreshnik Halitit, i akuzuar për vrasjen e shokut të tij M.Z. në Pejë. Ngjarja, e cila dyshohet se ndodhi për një borxh prej 77 mijë eurosh, vazhdon të mbetet pa epilog nga drejtësia kosovare.
Në dhjetor të vitit 2025, Gjykata Themelore në Pejë e kishte dënuar Halitin me 19 vjet burgim unik në rigjykimin e dytë. Ky vendim u kundërshtua me ankesa nga Prokuroria Themelore e Pejës, përfaqësuesi i familjes së dëmtuar dhe avokatja mbrojtëse e të akuzuarit.
Prokuroria dhe avokati Gëzim Kollçaku kërkuan dënim më të ashpër ose dënim prej 20 vitesh për veprën "Vrasje e rëndë". Mbrojtësja Nushe Kuka-Mekaj pretendoi shkelje esenciale procedurale dhe kërkoi rikualifikimin e veprës në vrasje në gjendje të tronditjes së fortë mendore.
Në vendimin e 7 prillit 2026, kolegji i Apelit konstatoi se Gjykata e Pejës ka bërë shkelje të rënda procedurale dhe nuk ka dhënë arsyetime të qarta për faktet vendimtare. Gjykata e shkallës së dytë theksoi se mungon analiza e mirëfilltë e dëshmive të dëshmitarëve.
Pikë kyçe e anulimit ishte mosvlerësimi i provave kundërthënëse, veçanërisht për shëndetin mendor të të akuzuarit. Apeli vuri në dukje dy ekspertiza me konstatime të kundërta, duke udhëzuar Gjykatën Themelore që në rigjykim të urdhërojë një super-ekspertizë për të sqaruar këtë rrethanë vendimtare.
Kjo lëndë ka një histori të gjatë gjyqësore që nga viti 2018, kur Haliti u dënua fillimisht me 22 vjet e gjysmë burgim. Ky vendim u anulua, ndërsa në rigjykimin e parë të vitit 2023 ai u dënua me 20 vjet e gjysmë, vendim që u anulua sërish në mars 2024.
Sipas aktakuzës, vrasja ndodhi më 6 mars 2017 në rrugën "Myrvete Maksutaj" në Pejë. Vendimi i fundit për rikthim në pikën zero u mor nga kolegji i gjyqtarëve Skender Çoçaj, Mentor Hajra dhe Arben Hoti, duke e lënë ende pa epilog përfundimtar këtë proces të stërzgjatur.
Burim: Ekonomia Online
— Redaksia ZHURMA