Ndahet nga jeta në moshën 25-vjeçare artistja Rinesa Qeriqi

Artistja nga Kosova Rinesa Qeriqi, e njohur në skenën muzikore me emrin artistik Rinesancë ose Rinessance, është ndarë nga jeta në moshën 25-vjeçare. Ajo po përballej prej kohësh me një tumor në tru, një betejë të cilën nuk mundi ta fitonte, ndërsa lajmin e trishtë e ka bërë të ditur familja e saj.

Për shkak të gjendjes shëndetësore, për të ishte organizuar një fushatë për mbledhjen e fondeve me qëllim mbulimin e kostove të trajtimit mjekësor. Motra e saj, Drenisa, ka ndarë një mesazh prekës në rrjetet sociale duke shprehur dhimbjen për humbjen e parakohshme dhe duke njoftuar se detajet e funeralit do të jepen më vonë për shkak se familja ndodhet larg.

Rinesancë lëvroi rrymën hip-hop e rap me tekste personale dhe shprehëse. Në dhjetor të vitit 2025, ajo publikoi albumin e saj me 12 këngë të titulluar „Muzikë Mbijetese“.