Misaillovski paralajmëron marrëveshje të re kolektive dhe paga më të larta

Ministri i Mbrojtjes, Vlado Misaillovski, ka paralajmëruar nënshkrimin e afërt të një marrëveshjeje të re kolektive për Armatën, e cila sjell gjithashtu rritje pagash. Gjatë një konference të përbashkët për shtyp me shefin e Shtabit të Përgjithshëm të Armatës, gjeneral-majorin Sashko Lafçiski, dhe përfaqësuesit e sindikatave, ai bëri të ditur se janë diskutuar përmirësimet për rreth 20 nene të kësaj marrëveshjeje.

Misaillovski theksoi se sindikatat përfaqësojnë 99,9 për qind të të punësuarve në dikasterin e mbrojtjes dhe në Armatë. Sipas tij, gjatë dy viteve të kaluara janë paguar mbi 26 milionë euro nga buxheti për shkak të padive nga çështjet që datojnë prej vitit 2019, por shprehu besimin se pagesa e mbetur do të zvogëlojë paditë e ardhshme.

Pas një takimi me ministren e Financave, ministri konfirmoi se është arritur pajtueshmëri për sigurimin e mjeteve shtesë përmes rishikimit të buxhetit. Ai paralajmëroi gjithashtu rritje të buxhetit për vitin e ardhshëm, ndërtimin e Shtëpisë së Armatës, modernizimin e kazermave, sigurimin e uniformave të reja luftarake, si dhe blerjen e dronëve, sistemeve kundër dronëve dhe dy helikopterëve të rinj që pritet të mbërrijnë muajin e ardhshëm.