KPK publikon arsyet për suspendimin e prokurores Nallbani-Gacaferri

Këshilli Prokurorial i Kosovës ka publikuar arsyetimin e vendimit për suspendimin e zëvendëskryeprokurores së Prokurorisë Themelore në Pejë, Arlinda Nallbani-Gacaferri, e cila mbante edhe detyrën e koordinatores për dhunën në familje, pas vrasjes së 49-vjeçares Arlinda Zekaj në Vitomiricë të Pejës më 25 tetor.

Siç raportoi Zhurma më 30 tetor 2026, ngjarja ka prodhuar një varg zhvillimesh institucionale, ku ndër të tjera drejtori i Përgjithshëm i Policisë, Gazmend Hoxha, dha dorëheqjen te kryeministri Albin Kurti.

Sipas dokumentit të publikuar nga Këshilli Prokurorial i Kosovës, Nallbani-Gacaferri ishte njoftuar se më 22 tetor 2026 ishte shkelur urdhri mbrojtës ndaj Arlinda Zekajt. Në vendimin e KPK-së theksohet se në shtëpinë e viktimës po qëndronin persona të tjerë, përfshirë Albert Sylajn, i dyshuar për vrasjen e saj. Policia e kishte njoftuar prokuroren për këtë ngjarje, ndërsa gjatë intervistimit, Arlinda Zekaj kishte deklaruar se Albert Sylaj e kishte kërcënuar me fjalët: «Largomu, largomu se të mys».

Megjithatë, sipas arsyetimit të Këshillit Prokurorial të Kosovës, Nallbani-Gacaferri kishte udhëzuar që Sylaj të intervistohej vetëm në cilësinë e dëshmitarit. KPK vlerëson se prokurorja nuk e kishte trajtuar kërcënimin e drejtpërdrejtë si rrethanë që kërkonte vlerësim të rrezikshmërisë ndaj viktimës. Pavarësisht informatave për rrezikun dhe kërkesave urgjente të Arlinda Zekajt, ajo nuk kishte ndërmarrë veprimet e nevojshme prokuroriale për mbrojtjen e saj, duke mos marrë parasysh provat dhe faktet e rastit dhe duke shkelur detyrimet për profesionalizëm dhe përgjegjshmëri.

Këto masa disiplinore pasuan disa zhvillime të tjera në sistemin e drejtësisë dhe atë të sigurisë. Më 29 tetor, KPK-ja kishte vendosur të suspendojë edhe kryeprokuroren e Pejës, Lumturije Vuçetaj. Në të njëjtën ditë, autoritetet kishin suspenduar edhe 11 zyrtarë policorë të hierarkisë komanduese në Pejë.