Ervin Demo: 347 të lënduar dhe 269 të mitur të shoqëruar gjatë protestave

Gjatë protestave në Shqipëri janë regjistruar gjithsej 347 persona të lënduar, mes të cilëve punonjës të Policisë së Shtetit, protestues, kalimtarë dhe gazetarë, deklaroi Ministri i Brendshëm, Ervin Demo. Sipas tij, 200 prej të lënduarve janë efektivë policie me dëmtime të ndryshme dhe disa prej tyre shumë të rënda, ndërsa 107 janë protestues. «Nuk dua të bëj diferencime. Ky numër tregon se intensiteti i dhunës ka qenë si asnjëherë më parë», u shpreh ministri, duke i cilësuar shifrat si këmbanë alarmi për dhunën dhe trajtimin proporcional nga Policia e Shtetit.

Ministri bëri të ditur gjithashtu se shtatë punonjës të policisë janë pezulluar dhe ndodhen nën hetim pasi dyshohet se kanë tejkaluar masën gjatë veprimeve të tyre. Agjencia e Mbikëqyrjes Policore (AMP) po punon për dhjetëra raste të referuara nga qytetarët dhe po bashkëpunon ngushtë me Prokurorinë e Tiranës për hetimin e ngjarjeve. Përveç institucioneve shtetërore, gjatë tubimeve është konstatuar dhunë edhe ndaj subjekteve private, institucioneve të pavarura dhe individëve të tjerë të pranishëm, ndërsa janë evidentuar edhe kërcënime dhe thirrje për sulme ndaj efektivëve në rrjetet sociale.

Një tjetër fenomen i theksuar nga ministri ka qenë pjesëmarrja e të miturve, ku 269 persona nën moshën 18 vjeç janë shoqëruar nga policia. Sipas tij, të miturit janë vendosur në vijën e parë të dhunës nga persona që qëndronin në prapavijë, duke e cilësuar situatën si shqetësuese dhe duke kërkuar masa parandaluese, ndërkohë që është miratuar edhe akti i ri normativ për menaxhimin e tubimeve të paligjshme.