Paraburgim për të dyshuarin e dytë të tentimvrasjes në Vushtrri

VUSHTRRI — Gjykata Themelore në Mitrovicë ka caktuar një muaj paraburgim ndaj Bekim Maxhunit, i cili u vetëdorëzuar në Polici lidhur me tentimvrasjen e ndodhur në afërsi të Vushtrria.

Incidenti i rëndë kishte ndodhur më 30 shtator, rreth orës 00:45, kur Policia ishte njoftuar se Luan Lokaj, rreth 27-vjeçar, ndodhej i lënduar pranë “Urës së Hekurit”, në rrugën “Xhavit Mulaku”. Sipas zyrtarëve policorë, në vendngjarje ishte gjetur një veturë VW Caddy, ngjyrë portokalli, e përplasur në një shtyllë të ndriçimit publik, si dhe katër gëzhoja, një karikator me pesë fishekë dhe një fishek tjetër brenda automjetit.

Pas shqyrtimit të kërkesës nga Departamenti për Krime të Rënda i Gjykatës Themelore në Mitrovicë, gjqtari i procedurës paraprake vendosi masën e paraburgimit prej një muaji ndaj të dyshuarit të dytë. Bekim Maxhuni, i lindur në vitin 1998, u paraqit para gjykatës të premten, më 30 tetor, pasi më 28 tetor ishte vetëdorëzuar te hetuesit rajonalë në Mitrovicën e Jugut, sipas njoftimit zyrtar. Gjatë intervistimit në prani të avokatit mbrojtës, ai fillimisht ishte ndaluar për 48 orë dhe kishte treguar vendin ku kishte fshehur një pistoletë të tipit “Crvena Zastava”, të kalibrit 7.65 mm, të prodhimit jugosllav, së bashku me një fishek. Hetuesit shoqëruan të dyshuarin në lokacionin e treguar, ku arma u gjet dhe u sekuestrua si provë e dyshuar se është përdorur gjatë incidentit, ndërsa i dyshuari u dërgua në Qendrën e Paraburgimit në Mitrovicë.

Në vendngjarje, Luan Lokaj ishte gjetur i gjakosur në fytyrë, ndërsa kishte deklaruar se ishte sulmuar nga disa persona të panjohur me mjete të forta dhe se njëri prej tyre kishte shtënë disa herë me armë në ajër. Si pasojë e sulmit, ai kishte pësuar lëndime në kokë, frakturë të hundës dhe thyerje të gishtave në të dyja duart, duke u transferuar në QKUK për trajtim të mëtejshëm pas ndihmës së parë në Vushtrri. Për këtë rast, më 7 tetor ishte paraqitur në Polici edhe i dyshuari tjetër, Naim Maxhuni (57), ndaj të cilit gjykata kishte caktuar një muaj paraburgim më 9 tetor. Me vendimin e fundit, të dy të dyshuarit ndodhen në paraburgim, kurse hetimet vazhdojnë për veprën penale “Vrasje në tentativë në bashkëkryerje”.