Kombëtarja e Kosovës U15 nis paraqitjet në Baku për FIFA U-15 World Cup

Kombëtarja e Kosovës U15 ka mbajtur stërvitjen e parë në Baku të Azerbajxhanit, ku do të marrë pjesë në edicionin historik të FIFA U-15 World Cup & Festival. Kjo ngjarje e re ndërkombëtare, e organizuar nga FIFA, synon t'u ofrojë futbollistëve të rinj mundësi më të mëdha për zhvillim dhe përvojë, duke mbledhur përfaqësuese nga e gjithë bota prej 24 deri më 30 tetor.

Sipas të dhënave të ngjarjes, në këtë edicion marrin pjesë rreth 190 federata anëtare, ndërsa në program janë paraparë afro 1.000 ndeshje. Karakteristikë e këtij festivali është formati i lojës 8 kundër 8, me dy pjesë nga 20 minuta në fusha më të vogla, për të rritur kontaktet me topin dhe aftësitë teknike. Të gjitha ekipet do të vazhdojnë garën deri në ditën e fundit, ndërsa rezultatet e fazës së parë do të përcaktojnë nivelin e fazës pasuese.

Nën drejtimin e trajnerit Ilir Nallbani, “Dardanët” e rinj do të përfaqësohen nga 14 futbollistë. Paraqitja e tyre nis më 24 tetor kundër Estonisë në ora 09:00. Më 25 tetor pasojnë dy ndeshje: në ora 12:45 kundër Afrikës së Jugut dhe në ora 19:45 ndaj Moldavisë. Seria e ndeshjeve të para përfundon më 26 tetor me duelet kundër Francës në ora 11:30 dhe Anguillës në ora 18:15.