Ademi thotë se synim i Ulpianës është rikthimi në Ligën e Parë

Trajneri i Ulpianës, Fadil Ademi, ka bërë të ditur se synimi kryesor i skuadrës lipjanase është inkuadrim në Ligën e Parë të Kosovës. Skuadra e tij mban këtë moment vendin e parë në tabelën e Ligës së Dytë, ku pas 11 ndeshjeve të zhvilluara numëron 10 fitore dhe një barazim, pa pësuar asnjë humbje gjatë këtij sezoni kampional.

Klubi futbollistik nga Lipjani kishte garuar më parë në nivele më të larta të futbollit kosovar, por së fundmi po zhvillon garat në këtë kategori më të ultë. Gjatë kësaj periudhe, te skuadra janë bërë ndryshime në strukturën drejtuese, me synim stabilizimin dhe rikthimin e rezultateve pozitive në fushë.

Ecuria pozitive e ekipit ka ardhur si rezultat i paraqitjeve të futbollistëve dhe organizimit të klubit nën udhëheqjen e re të vëllezërve Dragaqina, sipas trajnerit Ademi. Ai sqaroi se në garën për ngjitje më lart janë edhe të paktën pesë skuadra të tjera rivale. Ndjekja për vendin e parë mbetet e hapur pasi në garë janë edhe Sharri, Drini, Besa e Artë dhe F.Kosova, si dhe disa ekipe të tjera. Për të ruajtur kryesimin e tabelës, udhëheqësi i shtabit teknik kërkoi përqendrim dhe përkushtim maksimal në secilën sfidë, duke e cilësuar Ligën e Dytë si një garë shumë të paparashikueshme.

Gjatë pjesës së mbetur të kampionatit, lipjanasit duhet të zhvillojnë edhe shumë ndeshje të tjera deri në përmbylljen e sezonit zyrtar. Skuadra synon të mbajë vazhdimësinë e rezultateve dhe të ruajë atmosferën pozitive brenda grupit të futbollistëve, ndërsa stafi teknik do të punojë për përmirësimin e mëtejshëm të lojës në fushë.

«I falënderoj pa masë tifozët që na mbështesin dhe vijnë të na përcjellin në çdo ndeshje, si në Lipjan, ashtu edhe në udhëtimet jashtë tij. I siguroj se skuadra do të vazhdojë të tregojë shpirt garues deri në momentin e fundit, me synimin e vetëm që Ulpianës t'ia kthejmë namin e dikurshëm», ka thënë trajneri Fadil Ademi.