Kosova renditet ndër pesë vendet e para në Evropë për ligj dhe rend nga Gallup
Raporti i institutit ndërkombëtar Gallup e pozicionon Kosovën me 90 pikë në Indeksin e Ligjit dhe Rendit për vitin 2025.
Redaksia ZHURMA · · 2 min lexim
Kosova pozicionhet ndër pesë vendet me rezultatin më të lartë në Evropë në Indeksin e Ligjit dhe Rendit për vitin 2025, sipas gjetjeve të publikuara në raportin «The Global Safety Report 2026» të institutit ndërkombëtar Gallup. Institucioni ka vlerësuar vendin me 90 pikë nga njëqind të mundshme, duke e ndarë vendin e pestë në kontinent me Danimarkën dhe Finlandën, ndërsa në shkallë globale pozicionohet në vendin e katërmbëdhjetë.
Sipas të dhënave të analizuara nga organizata, rajoni udhëhiqet nga Islanda me 93 pikë, e ndjekur nga Zvicra, Lituania dhe Norvegjia me nga 91 pikë secila. Matja e këtij indeksi pasqyron perceptimin e qytetarëve për sigurinë dhe përfshin katër tregues kryesorë: ndjenjën e sigurisë gjatë ecjes vetëm gjatë natës në zonën e banimit, shkallën e besimit në policinë lokale, si dhe përvojat e raportuara me vjedhjen e pronës, sulmet ose grabitjet gjatë vitit të fundit.
Përllogaritja përfundimtare e pikëzimit lëviz nga zero deri në një qind, ku shifrat më të larta dëshmojnë nivel më të madh të sigurisë së perceptuar dhe besim institucional. Raporti mbështetet në anketa të zhvilluara përgjatë vitit 2025 me 143.620 pjesëmarrës të moshës pesëmbëdhjetë vjeç e lart, të shtrirë në 140 shtete dhe territore, duke e vendosur Kosovën dhjetë pikë mbi mesataren botërore prej tetëdhjetë pikësh.