Martens kërkon distancimin e EPP-së nga partia e Vuçiqit
Gazetari gjerman Michael Martens kritikon bashkëpunimin e EPP-së me SNS-në dhe kërkon mbështetje për Kosovën e Malin e Zi.
Redaksia ZHURMA · · 1 min lexim
Gazetari i gazetës Frankfurter Allgemeine Zeitung, Michael Martens, ka përsëritur qëndrimet e tij kritike ndaj bashkëpunimit mes Partisë Popullore Evropiane dhe Partisë Progresive Serbe të presidentit Aleksandar Vuçiq. Përmes një reagimi në platformën X, ai ka kujtuar se kishte publikuar një artikull në shtator të vitit 2025 ku kërkonte ndërprerjen e këtij bashkëpunimi, pasi sipas tij SNS-ja nuk duhej të trajtohej si partner i besueshëm politik.
Martens ka treguar se artikulli i tij kishte nxitur diskutime në Berlin dhe kishte shtyrë EPP-në të niste një proces të brendshëm shqyrtimi, duke shtuar se ishte ftuar edhe në një takim konfidencial për të paraqitur qëndrimet e veta. «Nëse i thoni jo Orbanit, nuk mund t’i thoni po Vuçiqit», ka shkruar ai, duke vënë në pah se ndryshimi i qasjes ndaj Beogradit nuk duhet të shoqërohet me besim të verbër, përderisa Serbia nuk i bashkohet sanksioneve kundër Rusisë dhe vazhdon politikën nacionaliste ndaj Kosovës.
Në përmbyllje të qëndrimit të tij, gazetari ka theksuar se «fqinjët proevropianë, si Mali i Zi dhe Kosova, meritojnë mbështetjen e plotë të Berlinit dhe Evropës».