Kosova pëson disfata të tjera në volejboll pa fituar asnjë set

TALLIN — Përfaqësueset e Kosovës në volejboll, si në konkurrencën e meshkujve ashtu edhe në atë të femrave, kanë regjistruar disfata të radhës në kuadër të garave të "European League 2026". Volejbollistët kosovarë pësuan humbje të njëpasnjëshme ndaj Estonisë të premten dhe ndaj Austrisë të shtunën, me rezultat të njëjtë 3:0 në sete.

Këto ndeshje u luajtën në Tallin të Estonisë. Dy sfidat e para të volejbollistëve ishin zhvilluar javë më parë në Riga të Letonisë, ku Kosova pësoi humbje po ashtu 3:0 nga Rumania dhe Letonia.

Nga ana tjetër, as volejbollistet e Kosovës nuk arritën të fitonin qoftë edhe një set të vetëm në sfidat e fundit. Ato u mposhtën me rezultat të pastër 3:0 nga Greqia dhe Portugalia, në ndeshjet e tyre të zhvilluara në qytetin Larissa të Greqisë, duke vazhduar ecurinë negative.

Paraprakisht, volejbollistet i luajtën dy ndeshjet e para në Gorazhde të Bosnjë-Hercegovinës javë më parë, ku u mposhtën nga Spanja me rezultatin 3:1 në sete dhe nga volejbollistet boshnjake me shifrat 3:0.

Ndeshjet e radhës të Kosovës, si për volejbollistë ashtu edhe për volejbolliste, zhvillohen javën e ardhshme në Prishtinë. Meshkujt përballen me Maqedoninë e Veriut dhe Izraelin, kurse femrat me Malin e Zi dhe Hungarinë në ndeshjet e fundit të këtij edicioni.

Burim: Koha.net
— Redaksia ZHURMA