Kosova pa drejtim strategjik, Kurti nuk shkon mirë me askënd

Vendi ndodhet në një situatë pa një drejtim të qartë strategjik dhe i përfshirë në një krizë të thellë politike, pa një plan afatgjatë. Kështu vlerëson David Kanin, i cili mban pozitën e profesorit të Studimeve Evropiane në Universitetin Johns Hopkins.

Sipas tij, Kosova ka funksionuar nën bindjen se Uashingtoni do të gjendet gjithmonë aty. Ai thekson se serbët kanë arritur sukses më të madh në menaxhimin e raporteve me Uashingtonin, sidomos që nga koha kur Kurti ka marrë pushtetin. Kanin shton se, pavarësisht pajtimit në thelb për dialogun me evropianët, kryeministri nuk arrin të ketë marrëdhënie të mira me askënd, ndërsa njerëzit nuk e pëlqejnë, fakt ky që sipas tij është shfrytëzuar nga Vuçiq.

Në një Uashington që karakterizohet si gjithnjë e më transaksional, analisti vlerëson se Prishtina ka gabuar duke refuzuar projektin e gazit të lëngshëm amerikan, duke dështuar kështu të lexojë rëndësinë politike të tij në raport me Shtetet e Bashkuara, ndryshe nga Serbia dhe Maqedonia e Veriut që kanë arritur marrëveshje furnizimi.