Si e cenon politika lirinë e shtypit në Kosovë?

PRISHTINË — Kosova renditet e 84-ta nga 180 vende në Indeksin Botëror të Lirisë së Shtypit për vitin 2026, duke u ngritur 15 vende krahasuar me vitin e kaluar. Por ligjëruesi i politikave mediale Jeton Mehmeti thotë se nevojiten hapa të mëtejshëm.

Sipas Mehmetit, indeksi nuk e mat Kosovën krahasimisht me vendet e tjera, por ndaj aspiratave të veta demokratike dhe standardeve të Këshillit të Evropës e Bashkimit Evropian. "Nuk kemi monopol mbi të vërtetën, por diversitet të mediave dhe opinioneve", thotë ai, duke e vlerësuar pluralizmin si pikën më të fortë të sistemit medial kosovar.

Megjithatë, Mehmeti identifikon klimën politike ndaj mediave si njërin ndër shqetësimet kryesore të mbetura. Ai thotë se etiketimet e politikanëve ndaj gazetarëve ndikojnë drejtpërdrejt në vetëcensurë: "Gazetarët të cilët ballafaqohen me thirrje të tilla, me etiketime të tilla, pastaj do ta kenë shumë më të vështirë që ta bëjnë punën e vet." Sulmet verbale dhe fushatat online ndaj gazetarëve janë përmendur si faktor që ka ndikuar në rëniet e mëhershme në renditje.

Problemet nuk janë vetëm të jashtme. Mbi 50 për qind e ankesave të shqyrtuara në vitin 2025 nga Këshilli i Mediave të Shkruara të Kosovës kanë rezultuar me shkelje të kodit të etikës — kryesisht nga mediat online. "Kjo tregon se mosrespektimi i standardeve profesionale mbetet sfidë serioze", thotë Mehmeti.

Për të konsoliduar ngritjen, Mehmeti rekomandon përditësimin e legjislacionit sipas standardeve evropiane, mekanizma të qëndrueshëm financiarë për mediat dhe ndërtimin e një kulture bashkëpunuese mes politikës dhe gazetarisë.

Burim: Evropa e Lire
— Redaksia ZHURMA