Komuna e Pejës mbyll 15 milionë euro kontratat kolektive pas vendimeve gjyqësore

PEJË — Komuna e Pejës ka përmbyllur plotësisht obligimet financiare që lidhen me kontratat kolektive, duke ekzekutuar përafërsisht 15 milionë euro pas vendimeve të gjykatave, sipas zëdhënësit Valmir Deqani.

Deqani tha për Ekonomia Online se pagesat u kryer drejtpërdrejt pas secilit vendim gjyqësor, duke shmangur procedurat e përbaruesve për të parandaluar kostot e kamatave që shtohen gjatë ekzekutimit forcë. “Nuk kemi lejuar që ato të shkojnë përmes përbaruesve, për arsye se dihet që ka pjesë të kamatave”, theksoi ai, duke shtuar se komunës i kanë kushtuar këto kontratata por tashmë janë të paguara dhe nuk ka asnjë obligim të mbetur.

Ai vlerësoi se komuna gjendet tani në fazën e rikuperimit financiar, por realizimi i projeteve vazhdon me ritëm më të ngadalë për shkak të kufizimeve buxhetore të rënda. “Po, realisht ne tani veç jemi duke u rikuperuar në atë pjesë, për arsye se projektet të cilat kanë qenë më parë jemi duke i vazhduar, por me procedura më të ngadalshme për shkak se buxheti ka qenë i limituar”, shpjegoi Deqani.

“Peja është thuajse e marrë peng nga buxheti që ka, për arsye se është shumë, shumë i limituar, sidomos në subvencione. Investimet kapitale janë shumë të vogla për një qytet me kaq popullsi dhe me kaq territor siç është Peja. Pra, dihet që jemi shumë të hendikepuar”, deklaroi ai, duke theksuar se kjo situatë ka shkaktuar dëme të madh për qytetin.

“Është bërë një lloj dëmi, ta them lirshëm, për arsye se ne jemi qytetarë të këtij vendi, taksat tona shkojnë për këtë vend, dhe të jemi ne të pezulluar nga këto, është shumë e dëmshme për një qytet si Peja. Kjo, sepse dihen resurset e Pejës, dihet kapaciteti i saj. Relievi i Pejës është në atë formë që mund të ofrojë shumë turizëm dhe rekreacion”, vlerësoi zëdhënësi.

Megjithatë, ai betoi se zhvillimi do të vazhdojë: “Megjithatë, ne jemi duke i zhvilluar projektet dhe, sa kohë kemi kryetar Gazmend Muhaxherin, nuk kemi për t’u ndalur derisa t’i realizojmë të gjitha”, theksoi Deqani.

Rreth mundësisë së një granti të katërt për komunat, Deqani shprehu optimizëm për një ndarje që bazohet në numrin e banorëve dhe territorin e komunës. “Për arsye se ndahet në bazë të banorëve dhe territorit të komunës, atëherë për Komunën e Pejës është i mirëseardhur. Do të ishte një shtytje shumë e madhe për ne, në realizimin e projeteve që kemi”, tha ai.

Sipas tij, një buxhet më i madh do të ndikonte drejtpërdrejt në zhvillimin e qytetit. “Po, realisht kjo ndihmon automatikisht në zhvillimin e qytetit të Pejës. Kjo do të na jepte mundësinë të rrisim pak subvencionet dhe investimet kapitale, dhe besoj që projektet do t’i kishim zhvilluar me një ritëm pak më të shpejtë. Kjo do të na kishte ndihmuar shumë”, përfundoi Deqani.

Burim: Ekonomia Online
— Redaksia ZHURMA