Si punësoi Komuna e Gjilanit 95 persona pa asnjë procedurë?
Pse auditimi i brendshëm gjen shkelje sistematike të prokurimit në administratën e Vetëvendosjes?
GJILAN — Një auditim i pasqyrave financiare vjetore të Komunës së Gjilanit për vitin 2025 ka zbuluar se 95 punonjës janë angazhuar pa asnjë procedurë ligjore rekrutimi. Komuna udhëhiqet nga kryetari Alban Hyseni, i partisë Vetëvendosje.
Raporti thekson se këta punonjës me kontrata për "shërbime të veçanta" kryenin në fakt detyra të pozitave të rregullta të punës. "Për këta punonjës nuk ishte aplikuar as procedurë e rekrutimit me kritere përzgjedhëse", thuhet në dokument.
Pagesat për 95 punonjësit u realizuan përmes kategorisë së mallrave dhe shërbimeve, duke anashkaluar kështu kufijtë buxhetorë të dedikuar për staf. Sipas nenit 101 të Ligjit për Zyrtarët Publik, marrëveshjet për shërbime të veçanta lidhen sipas legjislacionit të prokurimit publik.
Auditori e lidh shkeljen me "mungesën e kontrolleve efektive të brendshme dhe mbikëqyrjes nga menaxhmenti". Raporti paralajmëron se kjo praktikë rrit rrezikun e angazhimit të personave pa kualifikime të nevojshme dhe cenon transparencën.
Rekomandimi i auditorit është i qartë: kryetari duhet të sigurojë zbatimin e procedurave të prokurimit publik për çdo angazhim stafi. Pyetja që mbetet është nëse kjo shkelje do të ndiqet penalisht apo do të mbyllet me një rekomandim administrativ.
Burim: Demokracia
— Redaksia ZHURMA