Kompania TIMAK përfitoi miliona euro nga buxheti i shtetit pas dështimit në Ukrainë

Kompania “TIMAK SHPK” e Arjeta Pucës është skualifikuar nga dy procedura prokurimi në Ukrainë për shkak të dështimit total në dorëzimin e dokumentacionit bazë teknik, ligjor dhe financiar, pavarësisht se ka përfituar 30 milionë euro pagesa nga buxheti i shtetit shqiptar për furnizimin e ushtrisë me makina ushtarake dhe sisteme antidron.

Sipas të dhënave të publikuara nga emisioni investigativ, në korrik të vitit 2025 kjo shoqëri aplikoi për të përfituar tenderë në Ukrainë, por u skualifikua për shkak të mangësive kritike dokumentare. Bazuar në dy procesverbalet zyrtare të Shërbimit Shtetëror të Ukrainës për Situatat e Jashtëzakonshme, vendimet për skualifikimin e kompanisë u morën respektivisht më 4 gusht 2025 dhe më 2 shtator 2025. Analiza e dokumentacionit të dorëzuar tregoi mungesën e përshkrimit të detajuar teknik të automjeteve, mungesën e certifikatave të konformitetit për blindimin dhe mbrojtjen, si dhe mosdorëzimin e garancisë bankare ose sigurimit të ofertës. Për shkak të këtyre shkaqeve, autoriteti kontraktor në Ukrainë aplikoi pikat ligjore të rregullores së prokurimeve në kohë lufte që parashikojnë refuzimin e ofertave kur nuk përputhen me kushtet e specifikimit teknik dhe kërkesat e përgjithshme.

Sipas të dhënave të bëra publike nga emisioni, në qendër të gjithë skemës është izraeliti Ron Yeffet, i cili qëndron në krye të skemës Kayo. Hulumtimi tregon se në janar të vitit 2026, sipas audio-përgjimeve, Yeffet u kërkonte bashkëpunëtorëve ukrainas që të themelonin atje një ndërmarrje të ngjashme Kayo për të marrë tenderët pa garë, me pretendimin se në garë nuk plotëson asnjë kriter. Sipas analizës së dokumentacionit, kuptohet qartë se TIMAK nuk plotëson kriteret e kërkuara për certifikimin, eksperiencën dhe sigurinë e mjeteve, ndërsa Ron Yeffet kërkonte nga miqtë ukrainas që të shmangnin ligjet dhe tenderët njësoj siç kishte arritur ta bënte në Shqipëri. Megjithatë, kjo gjë u duk e pamundur përballë nevojës ekstreme për armë në Ukrainë, ndërsa Shqipëria ka anashkaluar të gjitha këto kritere që për shtetasit e Ukrainës ishin të panegociueshme.

Emisioni investigativ ka paralajmëruar se në vijim do të vazhdojë hulumtimin jo vetëm për mungesën e certifikimit të këtyre mjeteve ushtarake, por edhe për tenderët e tjerë që TIMAK ka përfituar që nga viti 2017 nga disa bashki në vend, për mjete që importoheshin të përdorura dhe shiteshin si prodhim i vendit. TIMAK nisi si projekt i ambicies së Arjeta Pucës dhe njohjeve të saj me eksponentë politikë në Kombinat, për të përfunduar si levë në projektin e zhvillimit të industrisë së mbrojtjes Kayo. Ndërkohë, sipas transmetimit, Arjeta Puca kishte akses deri në dokumentet e brendshme të qeverisë në një kohë kur edhe vetë anëtarë të strukturave shtetërore ishin të përfshirë.