Franca mobilizon 70 mijë policë për protestat e reja në të gjithë vendin

Franca do të dislokojë afër 70.000 policë dhe xhandarë në mbarë vendin të shtunën, në kuadër të përgatitjeve për demonstrata të reja pas episodeve të dhunshme të javës së kaluar. Ministri i Brendshëm, Laurent Nunez, njoftoi gjatë një konference për media në Paris se në operacionin e sigurisë do të përfshihen njësi speciale ndërhyrjeje, skuadra kundër trazirave dhe njësi elitare.

Lëvizja e protestave fillimisht nisi nga nxënësit e shkollave të mesme që kërkonin kushte më të mira mësimi, por më pas u përhap në të gjithë vendin e nxitur nga pakënaqësitë mbi rritjen e kostos së jetesës. Demonstratat e kësaj fundjave zhvillohen rreth gjashtë muaj para zgjedhjeve presidenciale për pasardhësin e Emmanuel Macronit, ku sondazhet e reja tregojnë rritje të mbështetjes për kandidaten e së djathtës ekstreme, Marine Le Pen. Ndërkohë, protesta paralele janë paralajmëruar edhe në Shqipëri, ku studentët po kërkojnë dorëheqjen e kryeministrit Edi Rama.

Ministri i Brendshëm, Laurent Nunez, paralajmëroi se në rrjetet sociale po qarkullojnë thirrje për dhunë dhe plaçkitje. Presidenti Emmanuel Macron u takua të premten me përfaqësues të nxënësve të shkollave të mesme, por këta të fundit bënë thirrje për vazhdimin e protestave derisa të paraqiten propozime konkrete. Sipas ministrit të Drejtësisë, Gerald Darmanin, gjykatat kanë dërguar në paraburgim 217 persona për ngjarjet e së shtunës së kaluar, gjysma e të cilëve nuk kishin të kaluar kriminale. Të enjten, Macron bëri thirrje për «ashpërsinë më të madhe» ndaj «akteve kriminale», duke akuzuar grupet e së majtës ekstreme se kishin synuar «ta rrëzonin republikën». Nga ana tjetër, një grup i së majtës ekstreme në Francën perëndimore u bëri thirrje mbështetësve në faqen e tij që «të mos kapen nga policia, të jenë të paparashikueshëm dhe t’i shmangen policisë».

Autoritetet lokale kanë vendosur kufizime të rrepta mbi tubimet. Në Orlean, ku Le Pen pritet të mbajë kongresin e partisë Tubimi Kombëtar (RN), 20.000 deri në 30.000 kundërprotestues parashikohet të kundërshtojnë ngjarjen, por mbledhja në qendër të qytetit është ndaluar. Ndalime për protesta janë vendosur gjithashtu në qendër të Lionit dhe në Marsej, ndonëse autoritetet në Marsej njoftuan të premten se shoqatat e punëtorëve do të lejohen të protestojnë në pjesën jugore. Në Paris janë refuzuar disa kërkesa për tubime, ndërsa këtë fundjavë janë mbyllur edhe muze të njohur.

Kufizimet e shumta kanë sjellë reagime nga organizatat ndërkombëtare. Organizata Amnesty International dënoi masat duke i cilësuar si «rrëshqitje drejt praktikave autoritare» që po «rrezikojnë të drejtën për të protestuar në mënyrë paqësore». Ndërkaq, Hulumtuesja e Lartë për Evropën në Human Rights Watch, Eva Cosse, deklaroi se «policia ka përgjegjësi si të sigurojë që protestat të zhvillohen në mënyrë paqësore dhe të sigurt, ashtu edhe ta mbrojë publikun nga trazirat e dhunshme», duke shprehur shqetësim për raportimet mbi lëndimin e fëmijëve.