Kodi i ri zgjedhor bllokuar në Kuvend

SHKUP — Kodi i ri zgjedhor mbetet i bllokuar në Kuvend me mbi 10 mijë amandamente opozitare. Qëndrimet partiake janë të ndara e një zgjidhje pritet të marrë kahje vetëm në shtator, ndërsa Bashkimi Evropian kërkon miratimin e ligjit, pa asnjë afat të ri për dakordim.

VMRO-DPMNE shpreson në ndërhyrjen e ministrit të ri të Drejtësisë, Jeton Shasivari, në bashkëbisedim me LSDM-në, e cila kundërshton votimin elektronik të diasporës. Sipas profesorit universitar Bashkim Selmani, partitë do të duhet të bien në ujdi ndaj kësaj kërkese të rëndësishme evropiane, për t’i dëshmuar Evropës jo vetëm një proces korrekt zgjedhor, por edhe funksionimin e shtetit ligjor.

“Kodi zgjedhor nuk është thjesht një ligj për organizimin e zgjedhjeve, është një kontratë besimi midis qytetarëve dhe shtetit,” tha Selmani. Ai shtoi se BE-ja synon zgjedhje të besueshme e konkurruese, institucione demokratike funksionale e transparencë në financimin e partive, “që aktualisht nuk ka si”.

Selmani nuk e përjashton që marrëveshja të shtyhet, duke theksuar mospajtimet për votimin e diasporës dhe modelin zgjedhor prej gjashtë njësive. Në shtator pritet edhe vlerësimi i Gjykatës Kushtetuese për nismën e partisë “E Majta” për financimin e fushatave. Kuvendi dështoi ta miratonte kodin muajin e kaluar, brenda dhjetë pikëshit të agjendës reformuese; sipas OSBE-së, ndryshimet ligjore nuk duhen lënë shumë afër zgjedhjeve.

Burim: Telegrafi
— Redaksia ZHURMA